Oliy Majlis senatorlari 2026 yil uchun soliq-byudjet siyosati haqidagi qonunni ma'qullashdi. Unga ko'ra, qo'shilgan qiymat solig'i (QQS) 12% darajada saqlanib qoladi.
Shuningdek, foyda solig'i 15%, daromad solig'i esa 12% miqdorida belgilangan. Yuridik shaxslar mol-mulki soliqlari 1,5%, qishloq xo'jaligi yerlari uchun yer soliqlari 0,95%, ijtimoiy soliq 12% (byudjet tashkilotlari uchun 25%), aylanmadan olinadigan soliq esa 4% darajasida qoladi.
Qonun loyihasida tadbirkorlarni, jumladan mebel ishlab chiqaruvchilar va zargarlik sohasi vakillarini qo'shimcha qo'llab-quvvatlash, eksport hajmini oshirish va aholi daromadlarini ko'paytirishga qaratilgan choralar nazarda tutilgan. Shuningdek, kichik korxonalar va mikrofirmalar uchun soliq hisobotlarini kechiktirish bilan bog'liq jarimalarni kamaytirish rejalashtirilmoqda.
Agar kompaniya oxirgi uch oy davomida to'g'ri hisobot bergan bo'lsa, hisobotni besh ish kunigacha kechiktirish uchun jarima qo'llanilmaydi. Bir oy ichida bir nechta hisobot bo'yicha kechikishlar bo'lsa, faqat bitta jarima belgilanishi ko'zda tutilgan.
Qabul qilingan hujjatda qishloq xo'jaligi, yengil sanoat, oziq-ovqat va mahalliy ishlab chiqarish sohalari uchun soliq va bojxona imtiyozlari hamda qishloq xo'jaligi yerlari uchun yer solig'i bo'yicha mahalliy Kengashlarga pasaytiruvchi yoki oshiruvchi koeffitsiyentlarni qo'llash huquqi berilishi belgilangan.
Mehmon guruhidagi foydalanuvchilar ushbu nashrga izoh qoldira olmaydi.
