Arsenal sobiq futbolchisi, belaruslik Aleksandr Gleb londonliklarning joriy Chempionlar ligasi mavsumida bosh sovringa da'vogarligi haqida fikr bildirdi. Bu haqda euro-football.ru xabar beradi.
Glebning aytishicha, "kanonirlar" turnirning umumiy bosqichini juda yuqori saviyada o'tkazdi. Biroq u hozircha musobaqada yaqqol bitta favoritni ajratib ko'rsatish qiyinligini ta'kidladi.
"Barcha 1/8 final ishtirokchilari aniq bo'lgach, manzara ravshanlashadi. Lekin, albatta, sobiq klubim Chempionlar ligasini yutsa yoki hech bo'lmaganda finalgacha yetib borsa, xursand bo'laman", — dedi Gleb.
Shuningdek, u finalda himoyaga yopilib oladigan jamoalar emas, hujumkor futbol ko'rsatadigan ikki jamoani ko'rishni istashini qo'shimcha qildi.
Ma'lumot uchun, Arsenal Chempionlar ligasining umumiy bosqichini 1-o'rinda yakunlab, sakkiz uchrashuvning barchasida g'alaba qozondi. Yangi formatda bunday natijaga birinchi bo'lib erishgan jamoa ham aynan "kanonirlar" bo'ldi.
“Zamin”ni Telegramʻda oʻqing!
