UFC yengil vazn toifasining sobiq chempioni Xabib Nurmagomedov Xamzat Chimayevning Shon Striklendga qarshi jangi haqida fikr bildirdi. Uning ta’kidlashicha, Chimayev bu bahsga taktik jihatdan yanada kengroq tayyorgarlik ko‘rishi va turli ssenariylarni oldindan hisobga olishi kerak edi.
Xabibning fikricha, professional MMA jangchisi oktagonga chiqishdan avval faqat bitta reja bilan cheklanib qolmasligi lozim. Jang boshqacha kechib qolsa, raqib kutilmagan uslubda harakat qilsa yoki asosiy reja ish bermasa, zaxira variantlar ham tayyor bo‘lishi shart.
“Xamzat barcha ssenariylarni ko‘rib chiqishi kerak edi. Agar shunday bo‘lsa-chi, boshqacha ketsa-chi, agar bu tomondan kirib kelsak-chi? Professional MMAchi hamma narsani hisobga olish zarur”, — dedi Nurmagomedov.
Xabib o‘z faoliyatidagi jang rejasi haqida ham gapirib o‘tdi. Uning aytishicha, shaxsan o‘zi uchun reja juda oddiy bo‘lgan: raqibni parterga olib o‘tish va shu yerda ustunlikni qo‘lga kiritish. Agar birinchi urinish samara bermasa, u yana va yana qayta harakat qilgan bo‘lardi.
“Shaxsan men uchun jang rejasini tuzish qiyin emas edi. Menda doim bitta variant bo‘lardi — raqibni parterga olib o‘tish! Agar o‘xshasa — yaxshi, o‘xshamasa yana yuz marta urinardim”, — dedi sobiq chempion.
Nurmagomedovning tanqidiga ko‘ra, Chimayev ayrim janglarida aynan shu qat’iyat va rejaga sodiqlikni yetarlicha ko‘rsatmagan. U Gilbert Byorns va Kamaru Usmanga qarshi bahslarni misol qilib keltirdi. Xabibning fikricha, Xamzat dastlabki raundlarda kurashini o‘tkaza olmaganidan keyin keyingi raundlarda asosan tik holatda jang qilishga majbur bo‘lgan.
Bu esa Chimayevning eng kuchli quroli hisoblangan kurash uslubidan to‘liq foydalanilmaganini anglatadi. Xabib aynan shu jihatga e’tibor qaratmoqda: agar sening asosiy ustunliging bor bo‘lsa, raqib uni to‘xtatgan taqdirda ham undan voz kechmaslik kerak.
Sobiq chempionning aytishicha, u bu haqda Chimayevga bir yil avval ham aytgan. Ammo Shon Striklendga qarshi jangda ham Xamzat xuddi shu taktik xatoga yo‘l qo‘ygan.
“Men bir yil avval unga bu haqda aytgandim. Biroq Shonga qarshi to‘qnashuvda ham Chimayev xuddi shu taktik xatoga yo‘l qo‘ydi”, — dedi Nurmagomedov “HUSTLE SHOW” podkastida.
Xabibning bu fikrlari MMA muxlislari uchun ancha qiziq. Chunki u o‘z faoliyati davomida aynan taktik intizom, parterdagi bosim va rejaga qat’iy amal qilish orqali mag‘lubiyatsiz chempionga aylangan. Shu bois uning Chimayev haqidagi tanqidi oddiy fikr emas, katta tajribaga asoslangan tahlil sifatida qabul qilinadi.
Qisqasi, Xabib Chimayevning muammosini ochiq aytdi: kuchli qurol bor, ammo undan oxirigacha foydalanish kerak. MMAda faqat xarakter emas, reja ham jang qiladi. Xamzat esa keyingi bahslarda shu saboqdan to‘g‘ri xulosa chiqarsa, yanada xavfliroq raqibga aylanishi mumkin.
“Zamin”ni Telegramʻda oʻqing!
