Liverpul va Real Madrid klublarining sobiq hujumchisi Michael Owen GOAL nashriga bergan eksklyuziv intervyusida Angliya terma jamoasining “Oltin avlodi” vakillaridan qaysi biri 2026-yilgi jahon chempionatida jamoaga yordam bera olishi haqida gapirdi. Uning fikricha, hozirgi tarkibning himoya chizig’idagi muammolarni hal qilish uchun o’tmish yulduzlari juda asqotgan bo’lardi. Bu haqda Goal.com xabar beradi.
Owen o’z tanlovida Rio Ferdinand va Steven Gerrard nomlarini alohida qayd etdi. “Mening eng katta xavotirim — himoyadagi zaifligimiz. Hujumda biz ancha kuchlimiz, ammo Steven Gerrard kabi mahoratli futbolchi bo’lsa, unga albatta joy topish kerak. Jamoani kuchaytirish uchun men Rio Ferdinand va Steven Gerrardni tanlagan bo’lardim”, — deydi sobiq forvard.
Shuningdek, Michael Owen Wayne Rooney va Harry Kane o’rtasidagi raqobatga ham to’xtalib o’tdi. Uning so’zlariga ko’ra, Wayne Rooney tarixdagi eng buyuk o’yinchilardan biri bo’lsa-da, hozirgi Angliya terma jamoasi hujum chizig’ida yetarli darajada mahoratli ijrochilarga ega. Shu sababli, u asosiy e’tiborni himoya va yarim himoya markazini mustahkamlashga qaratish lozimligini ta’kidladi.
Suhbat davomida hozirgi tarkibdan kimlar 2002-2006 yillardagi afsonaviy jamoada o’rin olishi mumkinligi haqidagi savolga Owen ehtiyotkorlik bilan javob berdi. U futbol so’nggi yillarda juda o’zgarganini va turli davr o’yinchilarini solishtirish qiyinligini bildirdi. Angliya terma jamoasi 60 yillik sovrinsiz seriyaga chek qo’yish maqsadida Shimoliy Amerikada o’tadigan JCH-2026 turniriga tayyorgarlik ko’rmoqda.
“Zamin”ni Telegramʻda oʻqing!
