Coinbase bosh direktori Brian Armstrong global moliya tizimini modernizatsiya qilish boʻyicha sakkiz banddan iborat strategik rejasini taqdim etdi. Ushbu yoʻl xaritasi kompaniyaning oddiy kripto-birjadan barcha turdagi aktivlar savdosi amalga oshiriladigan universal platformaga aylanish maqsadini aks ettiradi. Armstrongning ustuvor yoʻnalishlari qatoriga real aktivlarni tokenizatsiya qilish, 24/7 rejimdagi savdo, stablecoin toʻlovlari va sunʼiy intellekt asosidagi nazorat tizimlari kiradi. Bu haqda Cointelegraph.com xabar beradi.
Kompaniya allaqachon ushbu yoʻnalishlarning aksariyatida amaliy qadamlarni tashlamoqda. Xususan, Coinbase International Exchange orqali AQSHdan tashqaridagi treyderlar uchun Apple, NVIDIA va yirik indekslar boʻyicha muddatsiz fyuchers shartnomalari yoʻlga qoʻyilgan. Bu esa anʼanaviy fond bozoridan farqli oʻlaroq, haftasiga 7 kun va 24 soat davomida Apple va boshqa aksiyalar bilan savdo qilish imkonini beradi.
Toʻlovlar sohasida Coinbase USDC stablecoinidan foydalanishni kengaytirmoqda. Kompaniya Shopify va Stripe bilan hamkorlikda 34 ta davlatdagi millionlab savdogarlar uchun stablecoin toʻlovlarini joriy qildi. Shuningdek, Citigroup bilan hamkorlikda institutsional mijozlar uchun fiat valyutalarni stablecoinlarga oʻtkazish va transchegaraviy hisob-kitoblarni tezlashtirish ustida ish olib borilmoqda.
Armstrong, shuningdek, kapital shakllantirish va ochiq protokollar orqali moliyaviy imkoniyatlarni kengaytirishni maqsad qilgan. Yanvar oyida kompaniya AQSHning barcha shtatlarida Kalshi tomonidan qoʻllab-quvvatlanadigan prognozlar bozorini ishga tushirdi. Ushbu platforma foydalanuvchilarga sport, siyosat va madaniyat sohasidagi voqealar boʻyicha shartnomalar tuzish imkonini beradi.
Coinbase oʻzining ushbu strategiyasi bilan Binance va Kraken kabi raqobatchilariga qarshi pozitsiyasini mustahkamlamoqda. Kompaniya nafaqat kripto-aktivlar, balki anʼanaviy moliya infratuzilmasini blokcheyn texnologiyalari bilan integratsiya qilish orqali global kapital bozorida yetakchilikni qoʻlga kiritishni koʻzlamoqda.
“Zamin”ni Telegramʻda oʻqing!
