Ispaniya terma jamoasi bosh murabbiyi Luis de la Fuente 2026-yilgi Jahon chempionati uchun yakuniy 26 kishilik tarkibni eʻlon qildi. Mazkur roʻyxatda Barselona klubining sakkiz nafar vakili joy olgani holda, tarixda ilk bor Real Madrid jamoasidan birorta ham futbolchi Ispaniya qaydnomasiga kiritilmadi. Bu haqda Goal.com xabar beradi.
Kataloniya klubidan Joan Garcia, Eric Garcia, Pau Cubarsi, Gavi, Pedri, Dani Olmo, Ferran Torres va Lamine Yamal kabi yulduzlar Shimoliy Amerikadagi turnirga yoʻl oladigan boʻldi. Shu bilan birga, Real Madrid himoyachisi Dani Carvajal va yosh iqtidor Dean Huijsen kabi futbolchilarning roʻyxatdan tashqarida qolgani Ispaniya poytaxtida katta muhokamalarga sabab boʻldi.
Luis de la Fuente oʻz jamoasining imkoniyatlarini yuqori baholab, Ispaniyani turnir favoritlari qatoriga qoʻshdi. "Biz ehtiyotkor boʻlishimiz kerak, ammo favorit ekanimizni yashirmayman. Angliya yoki Fransiya kabi biz ham chempionlikka asosiy daʻvogarmiz. Eng qiyin jarayon — munosib futbolchilarni tarkibdan chiqarib tashlash boʻldi", — dedi 64 yoshli mutaxassis.
Tarkibda Angliya Premer-ligasi vakillari ham talaygina. Xususan, Manchester Siti yarim himoyachisi Rodri hamda Arsenal aʻzolari David Raya, Martin Zubimendi va Mikel Merino yakuniy roʻyxatga kiritilgan. Jarohatidan tiklanayotgan Nico Williams ham tarkibdan joy oldi, biroq Fermin Lopez oyogʻidagi sinish tufayli turnirni oʻtkazib yuboradi.
“Zamin”ni Telegramʻda oʻqing!
