Ливерпул ва Реал Мадрид клубларининг собиқ ҳужумчиси Майкл Оуэн ГОАЛ нашрига берган эксклюзив интервюсида Англия терма жамоасининг “Олтин авлоди” вакилларидан қайси бири 2026-йилги жаҳон чемпионатида жамоага ёрдам бера олиши ҳақида гапирди. Унинг фикрича, ҳозирги таркибнинг ҳимоя чизиғидаги муаммоларни ҳал қилиш учун ўтмиш юлдузлари жуда асқотган бўларди. Бу ҳақда Goal.com хабар беради.
Оуэн ўз танловида Рио Фердинанд ва Стивен Джеррард номларини алоҳида қайд этди. “Менинг энг катта хавотирим — ҳимоядаги заифлигимиз. Ҳужумда биз анча кучлимиз, аммо Стивен Джеррард каби маҳоратли футболчи бўлса, унга албатта жой топиш керак. Жамоани кучайтириш учун мен Рио Фердинанд ва Стивен Джеррардни танлаган бўлардим”, — дейди собиқ форвард.
Шунингдек, Майкл Оуэн Уэйн Руни ва Гарри Кейн ўртасидаги рақобатга ҳам тўхталиб ўтди. Унинг сўзларига кўра, Уэйн Руни тарихдаги энг буюк ўйинчилардан бири бўлса-да, ҳозирги Англия терма жамоаси ҳужум чизиғида етарли даражада маҳоратли ижрочиларга эга. Шу сабабли, у асосий эътиборни ҳимоя ва ярим ҳимоя марказини мустаҳкамлашга қаратиш лозимлигини таъкидлади.
Суҳбат давомида ҳозирги таркибдан кимлар 2002-2006 йиллардаги афсонавий жамоада ўрин олиши мумкинлиги ҳақидаги саволга Оуэн эҳтиёткорлик билан жавоб берди. У футбол сўнгги йилларда жуда ўзгарганини ва турли давр ўйинчиларини солиштириш қийинлигини билдирди. Англия терма жамоаси 60 йиллик совринсиз серияга чек қўйиш мақсадида Шимолий Америкада ўтадиган ЖЧ-2026 турнирига тайёргарлик кўрмоқда.
“Zamin”ни Telegram'да ўқинг!
