Angliya terma jamoasi sardori Harry Kane Angliya Premer-ligasining dramatik yakunlangan soʻnggi turidan soʻng oʻzining sobiq jamoasi bilan bogʻlandi. Hozirda Bavariya safida sovrinlar yutayotgan hujumchi, quyi ligaga tushib ketish xavfidan qutulib qolgan Tottenxem muxlislarining quvonchiga sherik boʻldi. Bu haqda Goal.com xabar beradi.
Joao Palhinha tomonidan birinchi boʻlim oxirida urilgan gol Tottenxemga Everton ustidan 1:0 hisobidagi gʻalabani taqdim etdi. Bu natija jamoaning elitada qolishini taʼminladi va ularning raqibi Vest Xemni 2012-yildan buyon ilk bor Chempionshipga ravona qildi. Londonliklar uchun oʻta omadsiz kechgan mavsum yakunida deyarli 50 yillik tanaffusdan keyin ilk bor quyi ligaga tushib ketish xavfi bartaraf etildi.
Harry Kane klubni tark etgan boʻlsa-da, Shimoliy London jamoasi bilan aloqani uzmagan. U ijtimoiy tarmoqlardagi oʻzining rasmiy X sahifasida: “Klubdagi barchani, ayniqsa muxlislarni tabriklayman — soʻnggi kunda ulkan kurash va ajoyib natija koʻrsatildi!” deya post qoldirdi.
Sobiq jamoasi ligada jon saqlash uchun kurashayotgan bir paytda, Harry Kane Germaniyada oʻzining sovrinlar kolleksiyasini boyitish bilan band edi. Angliyalik forvard DFB Pokal finalida Shtutgart darvozasiga het-trik yoʻllab, Bavariya bilan “oltin dubl”ni rasmiylashtirdi. Bu Kane uchun Germaniyadagi toʻrtinchi sovrin boʻldi.
Vincent Kompany qoʻl ostida ushbu mavsumda 51 oʻyinda 61 ta gol urgan Harry Kane, ayni damda Shimoliy Amerikada boʻlib oʻtadigan Jahon chempionatiga Angliya terma jamoasi safida yoʻl olishga tayyorgarlik koʻrmoqda. Uning individual koʻrsatkichlari rekord darajada qolmoqda.
“Zamin”ni Telegramʻda oʻqing!
