Yaqin orada Real Madrid boshqaruvini qoʻlga olishi kutilayotgan Jose Mourinho jamoa tarkibini kuchaytirish rejalarini tuzmoqda. Xabarlarga koʻra, tajribali murabbiy RB Leipzig safida porlayotgan yosh yulduz Yan Diomande transferiga qiziqish bildirmoqda. Sport Bild nashrining yozishicha, 19 yoshli vinger yangi murabbiyning rejalarida markaziy oʻrinni egallashi va bevosita Vinicius Junior oʻrnini bosishi kutilmoqda. Bu haqda Goal.com xabar beradi.
Braziliyalik 25 yoshli yulduzning Madridni tark etishi haqidagi mish-mishlar bir necha oydan beri tinmayapti. Arab davlatlarining boy klublari tezkor dribling ustasi boʻlgan Vinicius Junior uchun katta mablagʻ sarflashga tayyor. Soʻnggi voqealardan keyin uning yozgi transfer oynasida jamoani tark etishi ehtimoli ortib bormoqda. Futbolchining oʻzi esa shartnomani uzaytirishga shoshilmayotganini va amaldagi kelishuvi 2027-yilgacha ekanini taʼkidlagan.
Yan Diomande Germaniyadagi debyut mavsumidayoq Yevropaning grand klublari eʼtiborini tortishga ulgurdi. Garchi yosh iqtidor sohibi yana bir yil RB Leipzig safida qolish niyati borligini aytgan boʻlsa-da, uning soʻnggi intervyulari transfer uchun eshiklar ochiqligini koʻrsatmoqda. "Keyinchalik nima boʻlishini yozda koʻramiz. Oldinda Jahon chempionati turibdi, undan keyin hamma narsa oʻzgarib ketishi mumkin", — deydi futbolchi.
Real Madrid ushbu transferni amalga oshirishi uchun katta mablagʻdan voz kechishiga toʻgʻri keladi. RB Leipzig rahbariyati oʻz yulduzini kamida 150 million yevro evaziga qoʻyib yuborishni rejalashtirgan. Agar Vinicius Junior sotilsa, Madrid klubida ushbu transfer uchun yetarli mablagʻ paydo boʻladi. Diomandening Jahon chempionatidagi muvaffaqiyatli ishtiroki uning Madridga koʻchib oʻtish imkoniyatlarini yanada oshirishi shubhasiz.
“Zamin”ni Telegramʻda oʻqing!
