Argentina terma jamoasi bosh murabbiyi Lionel Scaloni jamoa sardori Lionel Messi 2026-yilgi jahon chempionati oldidan yigʻinga toʻliq sport formasida yetib kelmasligini tan oldi. Inter Miami yulduzi MLS doirasidagi soʻnggi uchrashuvda tizzasining orqa qismidagi mushaklaridan jarohat olgan edi. Bu haqda Goal.com xabar beradi.
Sakkiz karra "Oltin toʻp" sohibi "Filadelfiya Yunion"ga qarshi kechgan dramatik bahsda zaxiraga olindi. Dastlabki tibbiy koʻriklar jarohat oʻta jiddiy emasligini koʻrsatgan boʻlsa-da, Scaloni futbolchining holati 100 foiz ideal emasligini tasdiqladi. Murabbiyning soʻzlariga koʻra, endi qoʻshimcha testlar natijasini kutish lozim.
Inter Miami klubi sardorning chap oyogʻidagi mushak toliqishi tufayli noqulaylik his qilayotganini maʼlum qildi. Shunga qaramay, murabbiylar shtabi Lionel Messi 16-iyun kuni Jazoirga qarshi kechadigan guruh bosqichining ilk oʻyiniga qadar safga qaytishiga umid qilmoqda.
Argentina terma jamoasida faqat Messi bilan bogʻliq muammolar emas, balki boshqa yetakchilarning jarohatlari ham tashvish uygʻotmoqda. Xususan, Tottenxem himoyachisi Cristian Romero tizzasidan jarohat olgan boʻlsa, Atletiko Madrid aʼzosi Nahuel Molina mushaklari bilan bogʻliq muammolarga duch kelgan.
Shuningdek, darvozabon Emiliano Martínez qoʻl barmogʻidagi sinish bilan kurashmoqda. Scaloni 2-iyunga qadar yakuniy tarkibni eʼlon qilishi kerak, biroq asosiy oʻyinchilarning tiklanish jarayoni murabbiy uchun jiddiy bosh ogʻrigʻiga aylangan.
“Zamin”ni Telegramʻda oʻqing!
