Real Madrid yarim himoyachisi Arda Güler oʻzining sobiq ustozi Xabi Alonso haqida iliq fikrlar bildirdi. Turkiyalik iqtidor egasining soʻzlariga koʻra, ispaniyalik mutaxassis Bavariya bilan boʻlgan bahsdan soʻng unga maxsus tabrik yoʻllagan. "Bavariya bilan oʻyindan keyin u menga xat yozib, men bilan faxrlanishini aytdi. Bu xabarni olishdan juda xursand boʻldim. Uning yoʻli ochiq boʻlsin, menimcha, u haqiqatdan ham buyuk murabbiy", — dedi futbolchi TRT Sport nashriga bergan intervyusida. Bu haqda Goal.com xabar beradi.
Chempionlar ligasi chorak finali doirasidagi Bavariya bilan oʻyinlar Güler uchun hissiyotlarga boy oʻtdi. Myunxendagi javob bahsida Arda Güler uchrashuv boshidayoq Manuel Neuer darvozasini ishgʻol qilib, hisobni ochdi, keyinchalik esa jarima zarbasidan ajoyib gol urib, dubl qayd etdi. Biroq, dramatik yakunlangan oʻyinda Luis Diaz va Michael Olise tomonidan urilgan gollar evaziga Myunxen klubi 4:3 hisobida gʻalaba qozonib, yarim finalga yoʻl oldi.
Uchrashuv yakunida Arda Güler asablarini jilovlay olmadi. Final hushtagidan soʻng u hakam Slavko Vincic boshchiligidagi hakamlar guruhi bilan tortishib qolgani uchun ikkinchi sariq kartochka bilan jazolandi. Shunga qaramay, yosh yulduz oʻzining sobiq murabbiyi Xabi Alonso bilan oʻtkazgan davrlarini ijobiy xotirlaydi.
"Bizning munosabatlarimiz ajoyib edi. U menga oʻyin kalitini topshirgandek boʻlardi, men aynan shuni qidirgan edim. U har kuni oʻyinchini qanday qilib yaxshiroq qilish, u bilan qanday muloqot qilish haqida oʻylab uygʻonardi. U sizni xonasiga chaqirib, taktikani tushuntirsa, unga ishonmaslikning iloji yoʻq", — deya qoʻshimcha qildi Real Madrid aʼzosi.
“Zamin”ni Telegramʻda oʻqing!
