Nyukasl jamoasi yulduzi Anthony Gordon yozgi transfer bozoridagi eng talabgir nomlardan biriga aylandi. Angliyalik vingerga Germaniya giganti Bavariya jamoasi asosiy maqsad sifatida qarashiga qaramay, futbolchining oʻzi faoliyatini La Ligada davom ettirishni afzal koʻrmoqda. Xabarlarga koʻra, Gordon Barselona safiga qoʻshilishni orzu qilmoqda. Bu haqda Goal.com xabar beradi.
Barselona sport direktori Deko yozgi transferlar rejasini jadallashtirish maqsadida Londonda boʻlib turibdi. Mundo Deportivo nashrining yozishicha, dastlab uning tashrifi boshqa maqsadlarda deb taxmin qilingan boʻlsa-da, hozirda Anthony Gordon kataloniyaliklar rahbariyati uchun asosiy ustuvor vazifaga aylangan. Blaugrana mutasaddilari Nyukasl aʼzosini jamoa oʻyiniga katta taʼsir oʻtkaza oladigan universal hujumchi sifatida koʻrmoqda.
Londondagi uchrashuvlar futbolchining qaroriga ijobiy taʼsir qilgan koʻrinadi. Gordon ayni damda Hansi Flick tomonidan Kataloniyada amalga oshirilayotgan yangi loyihaning bir qismi boʻlish istagida. Bu yangilik Bavariya uchun kutilmagan zarba boʻldi. Myunxenliklar darvozabon Alexander Nubel va maʼlum miqdordagi mablagʻ evaziga vingerga ega chiqmoqchi edi.
Shuningdek, Liverpul ham Muhammad Salah oʻrniga munosib nomzod sifatida Gordonni koʻz ostiga olgan edi. Biroq, Mersisaydga qaytish imkoniyati boʻlishiga qaramay, futbolchi Barselona variantini Liverpul yoki Bavariya taklifidan ustun qoʻymoqda. Nyukasl oʻz yulduzini 75 million funt sterlingdan (taxminan 85-90 mln yevro) kamiga qoʻyib yubormoqchi emas.
Barselona hozircha bu summani toʻlashga tayyor emas, ammo Spotify Camp Nou rahbariyati oʻzaro kelishuvga erishish borasida optimistik kayfiyatda. Agar Gordon transfer uchun bosim oʻtkazishda davom etsa va maosh borasidagi talablarini klubning moliyaviy holatiga moslashtirsa, kelishuv amalga oshishi mumkin. Barselona futbolchi bilan besh yillik shartnoma imzolab, uni chap qanotda Rafinya bilan raqobatlashadigan asosiy nomzod sifatida koʻrmoqda.
“Zamin”ni Telegramʻda oʻqing!
