Reuters agentligining xabar berishicha, SpaceX va AQSH Mudofaa vazirligi oʻrtasida Eron hududidagi harbiy amaliyotlarda qoʻllanilayotgan Starlink sunʼiy yoʻldosh aloqasi xizmatlari narxi boʻyicha nizo kelib chiqdi. Ilon Maskning sunʼiy yoʻldoshlari orqali boshqariladigan LUCAS kamikadze-dronlari jang maydonida muvaffaqiyat qozona boshlagach, SpaceX rahbariyati Pentagondan aloqa uchun toʻlovni bir necha barobar oshirishni talab qildi. Bu haqda Ixbt.com xabar beradi.
Kompaniya top-menejerlari harbiy amaldorlarga ular standart mobil aloqa tarifi (terminal uchun oyiga taxminan $5000) boʻyicha haq toʻlayotganini, biroq amalda real qiymati $25 000 ga yaqin boʻlgan yuqori tezlikdagi kanallardan foydalanayotganini maʼlum qilgan. SpaceX bu talabni dronlarning jangovar sharoitdagi ishi premium aviatsiya tarifiga mos kelishi bilan izohladi. Pentagon esa portlashigacha bir necha soat uchadigan dronlar uchun toʻliq oylik aviatsiya paketini sotib olish mantiqsiz ekanini bildirgan boʻlsa-da, yakunda yon berishga majbur boʻldi.
Shu bilan birga, tomonlar oʻrtasida yana bir moliyaviy kelishmovchilik yuzaga keldi. AQSH hukumati Eron fuqarolariga internet blokirovkalarini chetlab oʻtishga yordam berish maqsadida Direct-to-Cell texnologiyasini ishga tushirish boʻyicha muzokaralar boshlagan. Avvalroq mamlakatga yashirincha olib kirilgan 6000 ta Starlink terminali Eron rasmiylari tomonidan musodara qilingan va aloqani boʻgʻuvchi tizimlar oʻrnatilgan edi.
Pentagonning smartfonlarga toʻgʻridan-toʻgʻri ulanish texnologiyasini yoʻlga qoʻyish haqidagi soʻroviga javoban SpaceX ulkan narx belgiladi: xizmatni ishga tushirish uchun $500 million va har oyda $100 million miqdorida qatʼiy abonent toʻlovi. Reuters maʼlumotlariga koʻra, bu talablar Mudofaa vazirligi vakillarini hayratda qoldirgan.
Hozirda vazirlik narxlar boʻyicha nizolarga rasmiy izoh bermayapti, biroq muqobil aloqa yetkazib beruvchilarni qidirish bilan birga, yana 3500 ta harbiy Starshield obunasini sotib olish imkoniyatlarini oʻrganmoqda. Bu esa Starlink uchun yuzlab million dollar qoʻshimcha yillik daromad keltirishi mumkin.
“Zamin”ni Telegramʻda oʻqing!
