Xakerlik tarixining uzoq oʻtmishiga nazar tashlasak, yillar yoki oʻn yillar oʻtsa-da, fosh etilmagan koʻplab maʼlumotlar oʻgʻriliklariga duch kelamiz. Microsoft va NVIDIA kabi gigant kompaniyalarga hujum qilgan LAPSUS$ kabi kiberjinoyatchilar yoki Rossiya va Xitoyning hukumatga aloqador xakerlik guruhlari aʼzolari aniqlanib, qidiruvga berilgan boʻlsa-da, baʼzi guruhlar hamon sirli boʻlib qolmoqda. Kiberxavfsizlik tarixidagi eng qiziqarli holatlarning aybdorlari, motivlari va javoblari hali ham mavjud emas. Bu haqda Techcrunch.com xabar beradi.
Ushbu sirli voqealar orasida eng gʻalati epizodlardan biri Shadow Brokers guruhi bilan bogʻliq. Ushbu jumboqli guruh kutilmaganda internetda paydo boʻlib, AQSH Milliy xavfsizlik agentligiga (NSA) tegishli deb ishonilgan xakerlik vositalari arsenalini ommaga eʼlon qildi va keyin gʻoyib boʻldi. 2016-yilning yozida, AQSHdagi prezidentlik saylovlari bilan bogʻliq kiberhujumlar avjiga chiqqan paytda, guruh Twitter tarmogʻida paydo boʻlib, bir nechta OAV nashrlarini oʻz postlarida belgilay boshladi.
Guruh tomonidan eʼlon qilingan hujjatda "Equation Group kiber-qurollari auksioni" haqida soʻz borgan edi. Maʼlumot uchun, Equation Group bevosita NSA tomonidan boshqarilishi taxmin qilinadigan maxfiy xakerlik boʻlinmasidir. Xakerlar oʻz postlarida: "Kiberurushning hukumat homiylari va undan foyda koʻruvchilar diqqatiga! Dushmaningizning kiber-qurollari uchun qancha toʻlaysiz?" deya savol tashlab, kamida bir million Bitcoin talab qilishgan.
Xavfsizlik boʻyicha tadqiqotchilar ushbu vositalarni tahlil qilganda, ular nihoyatda murakkab kiber-qurollar ekanligini va katta ehtimol bilan NSAʼdan oʻgʻirlanganini tasdiqlashdi. Baʼzi dasturlarning nomlari Edward Snowden tomonidan fosh etilgan maxfiy hujjatlardagi nomlar bilan bir xil edi. Shadow Brokers tomonidan qoʻllanilgan buzilgan ingliz tili va gʻalati muloqot uslubi koʻpchilikda shubha uygʻotdi — ular goʻyoki oʻzlarining haqiqiy qiyofasini yashirish uchun ataylab shunday yoʻl tutishgan.
Guruh oʻz faoliyati davomida faqat bir marta jurnalist bilan bogʻlanib, qisqa intervyu bergan. Koʻp oʻtmay, ular barcha oʻgʻirlangan vositalarni ommaga ochiq holda eʼlon qilib yuborishdi. Bugungi kunga qadar ushbu guruh ortida kim turgani va ularning asosiy maqsadi nima boʻlgani kiberxavfsizlik mutaxassislari uchun eng katta jumboqlardan biri boʻlib qolmoqda.
“Zamin”ni Telegramʻda oʻqing!
