Мянма ҳарбий ҳукумати онлайн фирибгарликка қарши курашишга қаратилган янги қонун лойиҳасини эълон қилди. Ҳужжатда криптовалюталар билан боғлиқ жиноятлар ва ноқонуний фирибгарлик марказларига нисбатан ўта қатъий чоралар кўзда тутилган. Расмийларнинг таъкидлашича, ушбу қонун мамлакат суверенитети ва барқарорлигига таҳдид солаётган кибержиноятларни жиловлаш учун зарур. Бу ҳақда Cointelegraph.com хабар беради.
Янги қонун лойиҳасига кўра, рақамли валюта фирибгарлигида айбдор деб топилган шахслар 10 йилдан умрбод қамоқ жазосигача, ҳатто ўлим жазосига ҳам ҳукм қилиниши мумкин. Айниқса, мажбурий меҳнатга жалб қилинган ёки эксплуатация қилинган шахсларнинг ўлимига сабабчи бўлган фирибгарлик марказлари раҳбарларига нисбатан ўлим жазоси қўлланилиши белгиланган.
Жануби-Шарқий Осиёда кенг тарқалган фирибгарлик марказлари глобал миқёсда жиддий муаммога айланмоқда. Халқаро ташкилотлар ва АҚШ ҳукумати ҳам ушбу ҳудудлардаги кибержиноятчиликка қарши курашни кучайтирган. Хусусан, FBI ҳисоботига кўра, 2025-йилда америкаликлар крипто-фирибгарликлар туфайли 11 миллиард доллардан ортиқ маблағ йўқотган.
Мянма ҳукумати июн ойининг биринчи ҳафтасида йиғилиш ўтказиб, ушбу қонун лойиҳасини кўриб чиқиши кутилмоқда. АҚШ Адлия вазирлиги қошидаги махсус гуруҳлар эса Камбоджа, Лаос ва Мянмадаги уюшган жиноий гуруҳларга қарши курашни давом эттирмоқда.
“Zamin”ни Telegram'да ўқинг!
