BYD компанияси Юан Plus кроссоверининг янги, учинчи авлодини расман тақдим этишга тайёргарлик кўрмоқда. Моделнинг премераси 21-май куни Хитойда бўлиб ўтади. Илк бор Пекин автосалонида намойиш этилган ушбу автомобил серияли версияда янгиланган ташқи кўриниш, қайта ишланган салон ва илғор техник хусусиятларга эга бўлди. Бу ҳақда Ixbt.com хабар беради.
Янги кроссовер янада замонавий ва ихчам дизайн билан ажралиб туради. Автомобил олти хил рангда таклиф этилади, эшик тутқичлари эса ярим яширин шаклда ишланган. Машинанинг ўлчамлари 4665 х 1895 х 1675 мм ни, ғилдирак базаси эса 2770 мм ни ташкил этади. Харидорлар 18 ёки 19 дюймли ғилдирак дискларини танлашлари мумкин.
Салон ичида катта марказий дисплей ўрнатилган, узатмалар қутиси селектори эса рул устидаги даста кўринишига келтирилган. Марказий консолда смартфонлар учун сиmsиз қувватлаш панели пайдо бўлди. BYD муҳандислари интерфейсни ҳаддан ташқари сенсорлаштирмаслик учун баъзи жисмоний тугмаларни сақлаб қолишга қарор қилишди.
Техник жиҳатдан Юан Plus орқа узатмали янги электр платформага ўтди. Модел 278 ва 326 от кучига эга иккита электр двигател варианти билан тақдим этилади. Автомобил иккинчи авлод Бладе аккумуляторлари билан жиҳозланган бўлиб, у тезкор қувватлаш технологиясини қўллаб-қувватлайди ва бир марта қувватланганда 630 км масофани босиб ўтиш имконини беради.
“Zamin”ни Telegram'да ўқинг!
