Warner Bros. Discovery (WBD) раҳбарияти стратегик қарор арафасида турибди. Reuters манбаларига таянадиган бўлсак, компания директорлар кенгаши Netflix билан ҳамкорлик қилиш вариантини Paramount Skydance таклифига нисбатан мақбулроқ деб ҳисобламоқда.
Манбаларнинг таъкидлашича, Paramount Skydance таклифи молиявий жиҳатдан каттароқ кўринишига қарамай, WBD ичида Netflix билан келишувга эришиш истаги анча кучли. Гап шундаки, Netflix билан таклиф этилаётган битимнинг умумий қиймати 82,7 миллиард долларга баҳоланиб, у HBO Max платформаси ҳамда ўйин студияларини ўз ичига олади. Бу эса WBD учун асосий активларни сақлаб қолган ҳолда ривожланиш имконини беради.
Paramount Skydance томонидан илгари сурилган вариант эса 108 миллиард доллар билан баҳоланмоқда. Бироқ бу келишув WBD’нинг барча телевидение тармоқларини тўлиқ сотишни талаб қилади. Мутахассислар фикрича, айнан шу жиҳат шартномани анча мураккаб ва рискли қилиб қўяди.
Bloomberg тарқатган қўшимча маълумотларга кўра, Paramount’нинг муҳим ҳамкорларидан бири — Джаред Кушнерга тегишли Affinity Partners инвестиция компанияси ушбу келишувдан чиқиб кетган. Бу ҳолат тартибга солиш жараёнларини бироз енгиллаштириши мумкин, аммо WBD’нинг Netflix фойдасига оғишини ўзгартирмайди.
Reuters манбаларига кўра, ушбу йирик медиа бозори учун ҳал қилувчи қарор 17 декабр куни расман эълон қилиниши мумкин. Агар Netflix билан келишув тасдиқланса, бу глобал стриминг бозорида кучлар нисбатини янада ўзгартириши эҳтимолдан холи эмас.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
