24 январь куни Истанбулнинг Шишли туманидаги Қуюулибоғ кўчасида жойлашган чиқинди контейнерларидан бирида чойшабга ўралган аёл жасади аниқланган. Дастлабки маълумотларга кўра, топилмани маҳаллада чиқиндиларни саралаб юрувчи шахс кўриб қолган ва дарҳол полицияга хабар берган. Шундан сўнг ҳудуд ўраб олиниб, далилларни йиғиш ишлари олиб борилган.
Хабарларга кўра, аёлнинг боши ва кесиб олинган оёқлари солинган жомадон кейинчалик яқин атрофдаги бошқа чиқинди жойидан топилган. Ҳуқуқ-тартибот идоралари воқеа бўйича криминалистика гуруҳларини жалб этиб, жасадни суд-тиббий экспертизага юборган. Иш юзасидан Истанбул прокуратураси жиноят иши қўзғатгани билдирилди.
Тергов давомида марҳуманинг шахси аниқланиб, у 37 ёшли Ўзбекистон фуқароси Дурдона Ҳакимова экани маълум бўлган. Расмийлар барча эҳтимолий версиялар кўриб чиқилаётганини, иш жамоатчилик назоратида эканини таъкидлади. Шунингдек, аэропорт орқали Грузияга чиқиб кетишга уринаётган ўзбекистонлик икки гумондор ушлангани ҳақида ҳам хабар берилмоқда.
“Zamin”ни Telegram'да ўқинг!
