Тошкент метрополитенида 1 февралдан яна 19 та бекатда кассалар фаолияти тўхтатилади. Бу ҳақда “Тошкент метрополитени” ДУК маълум қилди.
Кассалар ёпиладиган бекатлар рўйхатига “Янгҳаёт”, “Сергели”, “Ўзгариш”, “Чоштепа”, “Миллий боғ”, “Мустақиллик майдони”, “Амир Темур ҳиёбони”, “Пушкин”, “Дўстлик”, “Авиасозлар”, “Тошкент”, “Ойбек”, “Космонавтлар”, “Ўзбекистон”, “Ғофур Ғулом”, “Чорсу”, “Туркистон”, “Шаҳристон” ва “Бодомзор” киради.
Бекатларда бир марталик QR-билет берувчи инфокиосклар ўрнатилади. Йўловчиларга тўловнинг ўндан ортиқ тури таклиф этилади: банк ва транспорт карталари, юзни таниш (Face ID), кафт орқали тўлов (PalmPay) ҳамда мобил иловалар.
Метрополитен маълумотига кўра, кассаларнинг ёпилиши чипта харид қилиш жараёнини тезлаштириш ва йўл ҳақини тўлашни соддалаштиришга хизмат қилади. Йўловчилар фикрини инобатга олган ҳолда, қолган бекатларда ҳам кассаларни босқичма-босқич ёпиш режалаштирилган.
Аввалроқ, 2025 йил 9 декабрь куни 16 та бекатда кассалар ёпилганди. Кассир лавозимлари бекор қилинади, ходимларга эса бухгалтерия, тикиувчилик ва қандолатчилик каби йўналишларда бепул қайта тайёрлаш курслари таклиф этилади.
“Zamin”ни Telegram'да ўқинг!
