Президент Шавкат Мирзиёев йиғилишда иқтисодий дипломатияни янада фаоллаштириш орқали экспорт ва инвестициялар оқимини кўпайтириш зарурлигини алоҳида таъкидлади. Давлат раҳбарининг қайд этишича, иқтисодий дипломатия шунчаки музокара эмас — у янги иш ўринлари, аҳоли даромади ва турмуш даражаси орқали инсон қадрини юксалтиришга хизмат қилади. Иқтисодий барқарорлик эса, ўз-ўзидан, давлат хавфсизлигининг мустаҳкам таянчи ҳисобланади.
Йиғилишда келтирилган рақамлар эса мавзунинг “қоғозда” эмас, амалда ҳам қаттиқ суръат олганини кўрсатади. Хусусан, икки ва кўп томонлама тадбирлар доирасида 2025 йилда умумий қиймати 160 миллиард долларга тенг инвестиция лойиҳалари ва савдо шартномалари бўйича битимлар имзоланган. Энг диққатга сазовори — тарихда биринчи бор ташқи савдо айланмаси 80 миллиард доллардан ошиб, экспорт 33,5 миллиард долларга етган. Хорижий инвестициялар ҳажми ҳам сезиларли ўсиб, 43 миллиард доллардан ошган.
Яна бир муҳим нуқта: ўтган йили 75 та давлатга экспорт ҳажми қарийб 4,5 миллиард долларга кўпайгани қайд этилди. Бу тенденцияни давом эттириш учун элчилар хорижий инвесторлар ва йирик компаниялар билан “биргаликда юриш”и, яъни фақат протокол эмас, реал шерикчиликни йўлга қўйиши лозимлиги урғуланди.
Истиқболли бозорлар мисолида Ироқ алоҳида тилга олинди. Ўз ишлаб чиқариши деярли йўқ, ички талабни қоплаш учун 100 миллиард долларлик маҳсулотни импорт қиладиган Ироқ Ўзбекистон ишлаб чиқарувчилари учун катта имконият экани айтилди. Шу муносабат билан Ироқдан 150 та йирик компания вакиллари Ўзбекистонга олиб келингани ижобий баҳоланди. Улар маҳаллий корхоналар фаолиятини кўриб, аввал Ўзбекистон маҳсулотлари ҳақида деярли тасаввури бўлмаганини тан олгани ҳам қайд этилган.
Энг қизиғи — натижа тез кела бошлаган: Ироқда корхоналаримизнинг расмий дистрибюторини очиб, Яқин Шарқ бозорларига жадал кириб бориш режаси муҳокама қилинган ва шу йилнинг ўзида Ироққа юзлаб миллион долларлик маҳсулот етказиб бериш бўйича келишувга эришилган.
Йиғилишда шу каби ёндашувни Ветнам, Баҳрайн ва Португалия билан ҳам йўлга қўйиш, ҳамкорлар топиш ва ушбу бозорларга кириш бўйича тизимли ишлаш кераклиги таъкидланди.
Қисқаси, мессеж аниқ: дипломатия “расм учун учрашув” эмас, экспортни очадиган калит бўлиши керак. Агар элчихоналар ва бизнес бир йўналишда ишласа, бугунги рекордлар эртага оддий нормага айланади — ва энг муҳими, бу ўсиш ҳар бир оила даромадида ҳам сезилади.
“Zamin”ни Telegram'да ўқинг!
