“Манчестер Сити” - "Арсенал" дуэли олдидан Гвардиола таркиби шаклланди

Фото: britball.ru / Макс Доуман ва Эрлинг Холланд

Англия Премьер-лигасининг 32-тури чемпионлик учун курашни янада кескинлаштириб юборди. Узоқ вақт пешқадам бўлиб келган "Арсенал" кутилмаганда ўз майдонида "Борнмут"га 1:2 ҳисобида мағлуб бўлди.

Шу пайтда "Манчестер Сити" ҳам "Челси"ни 3:0 ҳисобида мағлуб этиб, чемпионлик пойгасини яна қиздирди. Энди Гвардиола жамоасига 19 апрель куни “Арсенал”ни ўзаро тўқнашувда енгиши ва 31-турнинг қолдирилган ўйинида “Кристал Пэлас”дан ҳам уч очко олиб, жами олти баллик тафовутни йўққа чиқариши керак. Ҳар икки ўйин “Этиахад” стадионида ўтиши манчестерликлар учун қўшимча мотивация ҳисобланади.

Чемпионатнинг муҳим палласига келиб, “Арсенал” бироз толиқиб қолгани кўзга ташланяпти. “Манчестер Сити” эса, аксинча, ўйинини анча тартибга солиб олди.

Манчестерликлар мураббийи Хосеп Гвардиола бўлажак ҳал қилувчи ўйин олдидан асосий таркибни деярли шакллантириб бўлган. Жамоадаги асосий фигуралар ҳар бири ўз ўрнида ҳал қилувчи роль ўйнаши кутилмоқда.

Дарвозабон позициясида Жанлуижи Доннарумма юқори даражадаги сейвлари билан эътибор марказида. Ҳимоя марказида эса Абдуқодир Ҳусанов ва Марк Гехи жуфтлиги ишончли тандем сифатида намоён бўлмоқда.

Яримҳимояда Родри, Бернарду Силва ва Райан Шерки майдон марказини назорат қилиш вазифасини бажаради. Қанотларда эса Антуан Семеньо ва Жереми Доку ҳужумларни тезлаштириши кутилмоқда.

Ҳужум чизиғида эса асосий ишонч Эрлинг Холанд зиммасида бўлади. Унинг формадаги ҳар бир голи чемпионлик тақдирини ҳал қилиши мумкин.

Қисқача айтганда, “Сити” таркиби деярли тайёр, энди ҳаммаси майдонда ҳал бўлади. Чемпионлик пойгаси эса энг қизғин босқичига кирди — ҳар бир хатолик қимматга тушиши тайин.

Асосий таркиб: Доннарумма; Нуньес, Ҳусанов, Гехи, Айт-Нури; Родри, Бернарду, Шерки; Семеньо, Холанд, Доку

Захира: Траффорд, Аке, Нико, Ковачич, О'Райли, Рейндерс, Фоден, Савиньо, Мармуш.