"Манчестер Сити" сафида кадрлар ўзгариши давом этмоқда. Аввалроқ жамоа сардори Бернарду Силва ёзда клубни тарк этишини маълум қилган бўлса, энди яна бир муҳим футболчи билан хайрлашиш аниқ бўлиб улгурди.
Гап ҳимоя чизиғининг тажрибали вакилларидан бири Жон Стоунз ҳақида кетмоқда. Машҳур инсайдер Фабрицио Романо маълумотига кўра, 31 ёшли футболчи ёзги трансфер ойнасида жамоани тарк этади ва эркин агент мақомини олади.
Манбаларга кўра, Стоунз мавсум якунига қадар “шаҳарликлар”га барча мусобақаларда максимал ёрдам беришни мақсад қилган. У жамоа билан совринлар учун курашда қатнашиб, шундан сўнг янги чақириқларга йўл олади.
Жорий мавсумда ҳимоячи барча турнирларда 13 та ўйинда майдонга тушган бўлса-да, гол ёки голли узатма каби самарали ҳаракатлар билан ажралиб тура олмади. Бу эса унинг келажаги борасидаги саволларни янада кучайтирган эди.
Маълумот учун, Стоунзнинг амалдаги шартномаси 2026 йил 30 июнга қадар мўлжалланган. Transfermarkt портали баҳосига кўра, футболчининг бозор қиймати ҳозирда 15 миллион евро атрофида баҳоланмоқда.
Қисқаси, “Манчестер Сити”да катта ўзгаришлар бошланмоқда. Клуб таркибини янгилаш жараёнида яна қандай қарорлар қабул қилиниши эса ёзги трансфер ойнасида маълум бўлади.
“Zamin”ни Telegram'да ўқинг!
