O‘zbekiston dzyudochilari Bangkokda 13 ta medalni qo‘lga kiritdi

Bangkokda kadetlar va o‘smirlar o‘rtasida dzyudo bo‘yicha Osiyo chempionati nihoyasiga etdi, deb yozmoqda Gazeta.uz.

O‘zbekiston terma jamoasi kadetlar va o‘smirlar o‘rtasida dzyudo bo‘yicha Bangkokda (Tailand) bo‘lib o‘tgan Osiyo chempionatida 13 ta medalni qo‘lga kiritdi, deb xabar qiladi mamlakat Dzyudo federasiyasi.

Kadetlar o‘rtasidagi musobaqalarda O‘zbekiston uchta oltin, bitta kumush va to‘rtta bronza medali olib, medallar soni bo‘yicha ikkinchi o‘rinni egalladi. Birinchi o‘ringa oltita oltin medal bilan Qozog‘iston termasi ko‘tarildi. Xitoy Taybeyi jamoasi esa uchinchi o‘rinni oldi.

Musobaqalarda O‘zbekiston kadetlar jamoasidan 8 nafar o‘smir yigit va 5 nafar qiz ishtirok etdi. Shohsupaning eng yuqori pog‘onasiga final bahslarida eronlik Jovad Murodiyni enggan Jasur Sodiqov (73 kg.gacha), qirg‘izistonlik Erlan Sherovning kuragini erga tekkizgan Sherxon To‘raboyev (81 kg.gacha) va hindistonlik Pinki Balxaradan ustun kelgan Sanobar Sultonova (52 kg.gacha) ko‘tarilishdi.

Yagona kumush medalga 66 kg.gacha vazn toifasida G‘olibjon Sulaymonov sazovor bo‘ldi. Aloviddin Jo‘raqobilov (90 kg.gacha), Gulnur Muratbaeva (44 kg.gacha), Nodira Yo‘ldosheva (70 kg.gacha) va Dilnoza Kamolova (70 kg.dan ortiq) umumiy jamg‘armaga bronza medallarini taqdim etdi.

O‘zbekiston o‘smirlari 4 ta kumush va bitta bronza medali bilan medallar soni bo‘yicha ettinchi o‘rinni band etdi. Artyom Shturbabin (60 kg.gacha) va Mahliyo Mannonova (57 kg.gacha) terma jamoaga kumush medallar olib berdi. Musobaqalarning so‘nggi kuni Bekmurod Oltiboyev (100 kg.gacha) va Renat Nazmitdinov (100 kg.dan ortiq) shohsupaning ikkinchi pog‘onasini egalladi, Ilhomjon Farmonov (90 kg.gacha) bronza medalini qo‘lga kiritdi.