Butun o‘zbek xalqi va futbol ishqibozlari yillar davomida intizorlik bilan kutgan tarixiy damlarga juda oz vaqt qoldi. O‘zbekiston milliy terma jamoasi o‘z tarixida ilk marotaba futbol bo‘yicha Jahon chempionatining final bosqichida qatnashish uchun so‘nggi tayyorgarlik bosqichiga kirishmoqda. Ayni paytda mashhur italiyalik mutaxassis Fabio Kannavaro boshqaruvida qizg‘in hozirlik ko‘rayotgan bosh jamoamiz mundialdagi tarixiy yurishini Meksika tuproqlarida boshlasa-da, asosiy o‘quv-mashg‘ulot yig‘inlarini Amerika Qo‘shma Shtatlarida olib boradi.
Vakillarimiz AQSH yashil maydonlari mezbonlik qiluvchi o‘yinlar oldidan nufuzli Atlanta shahrida qo‘nim topadigan bo‘lishdi. Ushbu shahar sharafini MLS (Mayor Leaguye Sotsser) musobaqasida munosib himoya qilib kelayotgan mashhur «Atlanta Yunayted» klubi o‘z bag‘rini o‘zbek futbolchilariga ochmoqda. Amerika jamoasi o‘z ixtiyoridagi zamonaviy va barcha qulayliklarga ega bo‘lgan qarorgohini (bazasini) joriy yilning 10 iyunidan boshlab hamyurtlarimiz ixtiyoriga to‘liq topshiradi.
«Xush kelibsan, O‘zbekiston!» — Okean ortidan samimiy murojaat
Ushbu quvonchli va tarixiy voqelik munosabati bilan AQSHning yirik klubi o‘zining rasmiy ijtimoiy tarmoq sahifalari orqali O‘zbekiston milliy terma jamoasiga alohida bayonot bilan yuzlandi:
«Xush kelibsan, O‘zbekiston! „Atlanta Yunayted“ klubining maxsus mashg‘ulot markazi chorshanba, 10 iyundan boshlab, butun Jahon chempionati davomida O‘zbekiston milliy terma jamoasining rasmiy qarorgohi va asosiy bazasiga aylanadi», — deyiladi Amerika klubining rasmiy murojaatida.
«K» guruhidagi raqiblar va qizg‘in o‘yinlar taqvimi
Joriy yilgi Jahon chempionatida Fabio Kannavaro shogirdlari «K» guruhidan joy olgan bo‘lib, qit’amiz sharafini munosib himoya qilish uchun quyidagi kuchli raqiblarga qarshi maydonga tushishadi:
Kolumbiya — Janubiy Amerikaning eng shiddatli terma jamoalaridan biri;
Portugaliya — Yevropaning grand jamoasi va mundial favoritlaridan biri;
Kongo Demokratik Respublikasi — Afrikaning jismonan baquvvat va kutilmagan sovg‘alar taqdim eta oladigan vakili.
Milliy terma jamoamiz o‘zining tarixiy debyut uchrashuvini 18 iyun kuni Meksika poytaxti Mexiko shahridagi dunyoga mashhur, afsonaviy «Atsteka» stadionida Kolumbiya termasiga qarshi o‘tkazadi. Shundan so‘ng, vakillarimiz yana AQSHga qaytadilar va 23 iyun kuni Xyuston shahrida portugaliyalik yulduzlarga qarshi saf tortishadi. Aynan mana shu bahs dunyo OAVlari va millionlab futbol muxlislarining diqqat markazida turibdi. Guruh bosqichidagi so‘nggi hal qiluvchi uchrashuv esa 27 iyun kuni biz uchun qadrdon bo‘lib qolgan Atlanta shahridagi muhtasham arenada Kongo DR terma jamoasiga qarshi bo‘lib o‘tadi.
Eldor Shomurodov va «Atlanta Yunayted» o‘rtasidagi yashirin tarix
Ushbu ikki tomonlama hamkorlik zamirida o‘ziga xos qiziqarli voqea ham mavjud. Ma’lum bo‘lishicha, «Atlanta Yunayted» klubi skautlari 2024 yilning yozida O‘zbekiston milliy terma jamoasi sardori va betakror to‘purari Eldor Shomurodovning o‘yinini yaqindan kuzatib, uni o‘z tarkiblariga qo‘shib olish uchun rasmiy taklif bilan chiqishgan edi.
O‘sha davrda mahoratli hujumchimiz Italiyaning «Kalyari» klubidagi ijara muddatini yakunlab, A Seriyaning boshqa bir grandi — «Roma» klubi ixtiyoriga qaytgan payt edi. Afsustki, transfer oynasi yopilishi arafasida xalqaro hujjatlarni rasmiylashtirish jarayonlari kechikib ketgani sababli ushbu transfer amalga oshmay qolgan. Oradan vaqt o‘tib, taqdirning ajoyib hazili bilan Eldor Shomurodov o‘z jamoasini aynan o‘zini sotib olmoqchi bo‘lgan klub bazasiga boshlab kelmoqda.
Sizningcha, Fabio Kannavaro qo‘l ostidagi vakillarimiz Portugaliya va Kolumbiya kabi grandlar joy olgan «K» guruhidan keyingi bosqichga yo‘l ola bilishadimi?
“Zamin”ni Telegramʻda oʻqing!
