Cristiano Ronaldo Saudiya Arabistoniga koʻchib oʻtganidan beri ilk bor chempionlik unvonini qoʻlga kiritdi. Saudiya Pro ligasining soʻnggi turida Al-Nassr jamoasi Damac Club ustidan 4:1 hisobida gʻalaba qozonib, uzoq kutilgan chempionlikni rasmiylashtirdi. Bu haqda Goal.com xabar beradi.
Hozirda 41 yoshda boʻlgan Portugaliya yulduzi ushbu uchrashuvda dubl qayd etib, gʻalabaga munosib hissa qoʻshdi. Bu uning 2020-yilda Yuventus tarkibida qoʻlga kiritgan sovrinidan keyingi ilk yirik muvaffaqiyatidir. Hakamning final hushtagi chalinganidan soʻng, Cristiano Ronaldo hissiyotlarini jilovlay olmadi va koʻz yoshlarini tutib tura olmadi.
2023-yil boshida Saudiya klubiga kelib qoʻshilganidan beri Ronaldo muntazam ravishda diqqat markazida boʻlib kelmoqda. U oʻtgan ikki mavsumda 35 va 25 ta gol bilan toʻpurarlar poygasida gʻolib chiqqan boʻlsa-da, uning jamoasi har safar ikkinchi oʻrin bilan kifoyalangan edi.
Real Madrid tarkibida besh bor Chempionlar ligasi gʻolibi boʻlgan hujumchi endi Portugaliya terma jamoasi safida AQSH, Meksika va Kanada mezbonlik qiladigan Jahon chempionatiga yoʻl oladi. Bu u uchun rekord darajadagi oltinchi mundial boʻladi. Lionel Messi ham oltinchi bor turnirda ishtirok etishga yaqin turibdi, biroq amaldagi chempion Argentina hali oʻz tarkibini eʻlon qilgani yoʻq.
“Zamin”ni Telegramʻda oʻqing!
