Маркус Рэшфорднинг Барселонадаги ижараси якунига етар экан, жамоа ичида унга бўлган ишонч ортиб бормоқда. Нидерландиялик ярим ҳимоячи Френкие де Жонг очиқчасига клуб раҳбариятини англиялик ҳужумчини доимий асосда сотиб олишга чақирди. Рэшфорд Ханси Флик қўл остида каталонияликларнинг чемпионлик пойгасида муҳим рол ўйнади ва мухлислар меҳрини қозонди. Бу ҳақда Goal.com хабар беради.
СПОРТ нашрига берган интервюсида Де Жонг шундай деди: "Ҳа, у жамоада қолиш ҳуқуқини қўлга киритди. Майдонда ўтказган дақиқаларида у бизга жуда кўп нарса берди: голлар, ассистлар ва хавфли ҳужумлар. У рақиб ҳимояси учун ҳақиқий таҳдид сола оладиган тезкор ўйинчи. Агар у биз билан қолса, жуда хурсанд бўлардим".
28 ёшли ҳужумчининг Испаниядаги таъсири инкор этиб бўлмас даражада бўлди. Рэшфорд барча мусобақаларда 14 та гол ва 14 та голли узатмани амалга оширди. Айниқса, унинг Реал Мадридга қарши Эл-Класикода Лионел Месси услубида жарима зарбасидан урган голи чемпионлик тақдирини ҳал қилди ва Барселона мухлислари хотирасида муҳрланиб қолди.
Рэшфорднинг ўзи ҳам Манчестерга қайтишни истамаяпти ва трансферни амалга ошириш учун маошининг камайишига рози бўлган. Бироқ, Манчестер Юнайтед қўяётган юқори нарх ва Барселонанинг молиявий ҳолати битимни мураккаблаштирмоқда. Клуб ҳозирда асосий тўловни кечиктириш учун мажбурий сотиб олиш шарти билан қайта ижара вариантини кўриб чиқмоқда.
“Zamin”ни Telegram'да ўқинг!
