Албания терма жамоаси ва ҳозирда ижара асосида "Малорка" шарафини ҳимоя қилаётган Мараш Кумбулла дунёнинг энг кучли ҳужумчиларига қарши ўйнаш қанчалик қийинлиги ҳақида гапирди. "Рома"га тегишли бўлган марказий ҳимоячи Ла Лигада ҳам "Барселона"нинг ёш юлдузи Ламине Ямал, ҳам "Реал Мадрид" суперюлдузи Килиан Мбаппе билан тўқнаш келишга улгурди. Бу ҳақда Goal.com хабар беради.
Кумбулла ҳар икки футболчининг ўйин услубини таҳлил қилар экан, уларнинг майдондаги хавфлилик даражасини юқори баҳолади. "Мен Мбаппени яқинроқ қўриқлаганман, чунки у марказий ҳужумчи сифатида кўпроқ менинг ҳудудимда ҳаракат қилади. Ламине эса кўпинча қанотда ўйнайди, лекин уни майдонда кузатиш — бу ақл бовар қилмас ҳолат. У гўё ҳамма нарсани бир сония олдинроқ ҳис қилади ва барчадан ўзиб кетади", — деди ҳимоячи.
Ламине Ямалнинг иқтидори нафақат рақиблар, балки жамоадошлари томонидан ҳам эътироф этилмоқда. Яқинда Рафинья ҳам ёш юлдуз ҳақида гапириб, унинг даражасига чиқиш қийинлигини таъкидлаган эди. Ханси Флик қўл остида Ламине Ямал нафақат истиқболли ёш ўйинчи, балки жамоанинг ижодий маркази ва дунёнинг энг яхши қанот ҳужумчиларидан бирига айланди.
Шунингдек, Кумбулла ўз фаолиятида Хосе Моуриньо билан ишлаган даврларини ҳам эслаб ўтди. Унинг сўзларига кўра, "Специал Оне" унга ҳимояда ўйнашнинг психологик ва тактик нозикликларини ўргатган. "У менга баъзи ақлли усулларни тушунтириб берган: қачон мағлуб бўлишдан кўра қўполлик ишлатиш фойдалироқ экани ёки керакли вақтда сариқ карточка олиш сирларини ўргатган", — дея қўшимча қилди Кумбулла.
“Zamin”ни Telegram'да ўқинг!
