13:10 / 17.05.2016
6 401

Rossiya gipermarketlari Turkiya mahsulotlarini O‘zbekiston mahsulotlariga almashtirmoqda

Rossiya gipermarketlari Turkiya mahsulotlarini O‘zbekiston mahsulotlariga almashtirmoqda
Rossiyaning eng yirik gipermarketlari O‘zbekiston bilan meva-sabzavotlarni to‘g‘ridan-to‘g‘ri etkazib berish borasida muzokara o‘tkazmoqda. Bu haqda Sputnik agentligi "O‘zbekoziqovqatxolding" kompaniyasidagi manbaga asoslangan holda xabar bergan.

Bugungi kunda O‘zbekistonda etishtirilayotgan meva va sabzavotlarga Rossiyaning "Magnit", "Ashan", "6 sotok", "Essen" va boshqa ko‘plab yirik savdo markazlari tomonidan qiziqish tobora ortayotgani aytilgan.

"O‘zbekiston prezidenti Islom Karimovning Rossiyaga tashrifidan so‘ng rossiyalik tadbirkorlar va yirik kompaniyalardan ko‘plab talablar kelib tushdi. Ular bizga tayyor oziq-ovqat mahsulotlari hamda meva va sabzavotlarni to‘g‘ridan-to‘g‘ri etkazib berish iltimosi bilan murojaat qilishmoqda.

Yaqindagina aviareyslar orqali "Essen" savdo markaziga 5 tonna gilos etkazib berilganini ushbu hamkorlikning muvaffaqiyatli boshlanishi sifatida e’tirof etish mumkin. Yaqin orada shu yo‘nalish bo‘yicha yana 10 tonna gilos yuborilishi rejalashtirilgan.", — deb ta’kidladi manba.

Manbaning so‘zlariga qaraganda, bugungi kunda Rossiya gipermarketlari vakillari bilan muzokaralar olib borilmoqda. Gap 1 yillik emas, balki, 5-15 yillik shartnomalar imzolash to‘g‘risida bormoqda.

O‘zbekiston tomoni Rossiya uchun afzalliklar yaratish maqsadida, shartnoma doirasida o‘z mahsulotlariga mavsum davomida talabga qarab o‘zgarmaydigan, yagona narx o‘rnatishni taklif qilmoqda.

O‘zbekiston savdo-logistika markazlarida tashkil qilinayotgan, meva va sabzavotlarni saqlash, qayta ishlash va eksport qilishga ixtisoslashgan savdo-logistika markazlari yangi transport sxemasi asosi bo‘lib xizmat qilishi aytilmoqda. O‘zbekistonning 11ta viloyatida ana shunday ob’ektlarni yaratish bo‘yicha ish olib borilmoqda.

Xabarlarga ko‘ra, meva-sabzavotlar daladan bevosita savdo-logistika markazlariga olib kelinadi va keyinchalik eksport yoki tayyor mahsulot ko‘rinishida qayta ishlanishi uchun maxsus kameralarga joylanadi. Shundan so‘ng, mahsulotlar Rossiyadagi ixtisoslashtirilgan O‘zbekiston-Rossiya savdo uylariga yuboriladi. Bu uylardan mahsulotlar iste’molchi xonadoni ostonasigacha etkazib berilishi kutilmoqda.

"Rossiyadagi savdo uylarida chakana va ulgurji savdo yo‘lga qo‘yiladi", deydi manba.

O‘zbekiston rossiyalik hamkorlar bilan Rossiya hududida yangi savdo uylarini tashkil qilish borasida ham ish olib bormoqda. Yaqin yillarda tomonlar 15ga yaqin savdo uylarini tashkil qilishni rejalashtirishgan, ularning aksariyati Sibir va Uzoq Sharqda joylashtirilishiga alohida e’tibor qaratilmoqda.

Bugungi kunda Rossiyada shunga o‘xshash 10ga yaqin ob’ektlar faoliyat olib bormoqda, ular Moskva, Sankt-Peterburg, Barnaul, Novosibirsk va boshqa shaharlarda joylashgan.

"Kelajakda biz raqobat qilishi mumkin bo‘lgan turkiyalik ishlab-chiqaruvchilar boshqacha tartibda ish ko‘rishadi. Ular har biri o‘zicha harakat qiladi, raqiblarni bozordan siqib chiqarish maqsadida ko‘pincha sun’iy ravishda narxni pasaytirishadi. Biz esa Rossiya bozoriga yagona front bilan chiqamiz, mahsulotlarni yirik partiyada, muntazam ravishda va markazlashgan holda etkazib beramiz, shu bois ular bizga javob qaytara olishlari juda qiyin. Bundan tashqari, O‘zbekiston bir joyda turib qolgani yo‘q, tara va upakovka sifati, mahsulot sertifikasiyasi ustida ishlanmoqda", — deb ta’kidlagan manba.

Manba: Kun.uz

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Iqtisodiyot » Rossiya gipermarketlari Turkiya mahsulotlarini O‘zbekiston mahsulotlariga almashtirmoqda
[/banner_pushhouse