Janubiy Koreya moliya regulyatorlari Hana Bankning mamlakatdagi eng yirik kriptovalyuta birjasi Upbit operatori bo‘lgan Dunamu kompaniyasidan 6,55 foiz ulushni 668 million dollarga sotib olish rejasini ko‘rib chiqmoqda. Ushbu bitim doirasida bank aksiyalarni to‘g‘ridan-to‘g‘ri emas, balki Kakao Investment kompaniyasidan xarid qilishi nazarda tutilgan. Bu haqda Cointelegraph.com xabar beradi.
Moliya xizmatlari komissiyasi (FSC) rasmiylarining ta’kidlashicha, ushbu investitsiya an’anaviy bank va tijorat faoliyatini ajratish qoidalariga muvofiqligi nuqtai nazaridan baholanadi. Garchi kripto-aktivlar operatorlari an’anaviy moliya institutlari qatoriga kirmasa-da, regulyatorlar ushbu bitimni banklarning nobank biznesiga egalik qilish cheklovlari doirasida tekshirmoqda.
Hana Financial Group tarkibidagi bank bo‘linmasi 2,2 millionga yaqin Dunamu aksiyasini 1 trillion von (taxminan 668 million dollar) evaziga sotib olishga kelishib olgan edi. Agar bitim tasdiqlansa, Hana Bank Upbit birjasining to‘rtinchi yirik aksiyadoriga aylanadi.
Janubiy Koreyada banklarning kripto-aktivlar bilan bog‘liq faoliyati qonunchilikda aniq belgilanmagan bo‘lib, asosan nazorat siyosati va regulyatorlarning talqinlari asosida tartibga solinadi. Hozirda mamlakat hukumati kriptovalyutalar, steyblkoinlar va virtual aktivlar provayderlari uchun huquqiy bazani yaratuvchi Raqamli aktivlar to‘g‘risidagi qonun loyihasi ustida ishlamoqda.
“Zamin”ni Telegramʻda oʻqing!
