Singapur markaziy banki Bsquared Technology Pte. Ltd. kompaniyasining kripto-toʻlov litsenziyasini bekor qildi. Bir qator qoidabuzarliklar aniqlanganidan soʻng, firma raqamli toʻlov tokenlari boʻyicha xizmat koʻrsatish huquqidan mahrum etildi. Bu haqda Cointelegraph.com xabar beradi.
Singapur Pul-kredit boshqarmasi (MAS) chorshanba kungi bayonotida Bsquared kompaniyasining Major Payment Institution litsenziyasini qaytarib olganini maʻlum qildi. Joyida oʻtkazilgan tekshiruvlar natijasida kompaniyaning risklarni boshqarish amaliyoti va manfaatlar toʻqnashuvi siyosatida kamchiliklar, shuningdek, autsorsing boʻyicha koʻrsatmalarga rioya qilinmagani aniqlangan.
MAS maʻlumotlariga koʻra, Bsquared litsenziya olish uchun ariza topshirishdan boshlab tekshiruv jarayonigacha boʻlgan davrda bir necha bor notoʻgʻri yoki chalgʻituvchi maʻlumotlar taqdim etgan. BSQ nomi bilan ham tanilgan ushbu kompaniya oʻz litsenziyasini 16 oy oldin Singapurning 2019-yildagi Toʻlov xizmatlari toʻgʻrisidagi qonuniga muvofiq olgan edi.
Endilikda kompaniya auditorlar tomonidan barcha mijozlar mablagʻlari qaytarilganini tasdiqlovchi yopilish sertifikatini taqdim etishi shart. Bsquared vakillari tartibga soluvchi organga hozirda mijozlar oldida hech qanday qarzdorlik yoki aktivlar mavjud emasligini bildirgan. MAS hozirda kompaniyaning asosiy rahbarlari masʻuliyatini ham koʻrib chiqmoqda.
Singapur Osiyoning yetakchi kripto-xablari biri hisoblanib, bu yerda Coinbase va Ripple kabi gigantlarning mintaqaviy ofislari, shuningdek, Crypto.com bosh qarorgohi joylashgan. Hozirgacha MAS tomonidan 37 ta raqamli toʻlov xizmatlari litsenziyasi berilgan boʻlib, ularni bekor qilish holatlari juda kam uchraydi.
“Zamin”ni Telegramʻda oʻqing!
