AQSH Prezidenti Donald Trump moliya texnologiyalari (fintech) sohasidagi innovatsiyalarga toʻsqinlik qilayotgan toʻsiqlarni va bank hamkorligi hamda toʻlov tizimlaridan foydalanishdagi muammolarni qayta koʻrib chiqish toʻgʻrisidagi farmonni imzoladi. Mazkur hujjat Federal Reserve Board zimmasiga fintech va kripto kompaniyalarining Fed toʻlov tizimlariga kirishini tartibga soluvchi huquqiy va meʼyoriy bazani baholash vazifasini yuklaydi. Bu haqda Cointelegraph.com xabar beradi.
Farmonga koʻra, Federal Reserve boshqaruvchilari 120 kun ichida fintech va kripto firmalariga toʻgʻridan-toʻgʻri kirish huquqini berishning huquqiy asoslarini oʻrganib, hisobot taqdim etishlari lozim. Bu chora pul mablagʻlarining samarali harakatlanishini taʼminlash va vositachi banklarga boʻlgan bogʻliqlikni kamaytirishga qaratilgan asosiy bank infratuzilmasidan foydalanish imkoniyatini kengaytirishni koʻzda tutadi.
Soʻnggi yillarda fintech va kripto kompaniyalari bank xizmatlaridan foydalanishda jiddiy qiyinchiliklarga, jumladan, "Operation Chokepoint 2.0" deb nomlangan kampaniya doirasida bank tizimidan uzib qoʻyilish holatlariga duch kelishgan. Donald Trump maʼmuriyati ushbu siyosatni oʻzgartirish va innovatsiyalarni qoʻllab-quvvatlash uchun meʼyoriy hujjatlarni soddalashtirish niyatida ekanini bildirdi.
Keyingi 90 kun davomida AQSH federal moliyaviy regulyatorlari rahbarlari fintech firmalarining kredit uyushmalari, broker-dilerlar va investitsiya maslahatchilari bilan hamkorlik qilishiga toʻsqinlik qilayotgan qoidalarni koʻrib chiqadilar. Shuningdek, bank ustavlari va federal litsenziyalar uchun arizalarni topshirish jarayonini optimallashtirish boʻyicha takliflar tayyorlanadi.
Donald Trump farmonda AQSH moliya texnologiyalari sohasida jahon yetakchisi ekanini va bu mavqeni saqlab qolish uchun tartibga solish amaliyotini yangilash zarurligini taʼkidladi. Cato Institute tadqiqotlariga koʻra, koʻplab debanking holatlari banklarning oʻz siyosati emas, balki hukumat bosimi natijasida yuzaga kelgan.
“Zamin”ni Telegramʻda oʻqing!
