Samsung oʻzining flagman qurilmalar qatorini tubdan oʻzgartirishni rejalashtirmoqda. Koreyaning ETNews nashri xabariga koʻra, 2027-yil boshida taqdim etilishi kutilayotgan Galaxy S27 seriyasida mutlaqo yangi model — Galaxy S27 Pro paydo boʻladi. Ushbu model Ultra versiyasining deyarli barcha texnik imkoniyatlarini oʻzida jamlagan holda, ancha ixcham korpusda taqdim etilishi kutilmoqda. Bu haqda Ixbt.com xabar beradi.
Yangi strategiyaga koʻra, Samsung flagmanlar oilasi toʻrtta modeldan iborat boʻladi: Galaxy S27, Galaxy S27+, Galaxy S27 Pro va Galaxy S27 Ultra. Pro versiyasi 6,47 dyuymli OLED-displey bilan jihozlanadi. Bu uni bazaviy modeldan biroz kattaroq, ammo Ultra modelidan sezilarli darajada ixchamroq qiladi.
Galaxy S27 Pro modelining asosiy oʻziga xosliklaridan biri bu Privacy Display funksiyasidir. Hozircha ushbu texnologiya faqat Galaxy S26 Ultra modelida qoʻllanilishi kutilmoqda. Shuningdek, yangi smartfon 200, 50 va 50 megapikselli datchiklardan iborat kuchli kamera tizimiga ega boʻladi. Xuddi shunday kamera majmuasi Galaxy S27 Ultra modeliga ham oʻrnatilishi taxmin qilinmoqda.
Ekspertlarning fikricha, Pro modelining chiqarilishi Samsung kompaniyasining eksperimental Edge seriyasiga boʻlgan past talabga javobi boʻlishi mumkin. Kompaniya S Pen stilusisiz, lekin eng yuqori texnik koʻrsatkichlarga ega boʻlgan «ixcham Ultra»ni yaratish orqali kichikroq oʻlchamdagi flagmanlarni xush koʻruvchi foydalanuvchilar eʼtiborini tortmoqchi.
“Zamin”ni Telegramʻda oʻqing!
