Joriy yilning 4–8 aprel kunlari kutilayotgan yog‘ingarchiliklar va havo haroratidagi o‘zgarishlar sabab respublika tog‘li hududlarida – dengiz sathidan 2000 metrdan yuqori joylarda qor ko‘chishi xavfi yuzaga kelishi mumkin. Bu haqda O‘zgidromet tomonidan shoshilinch ogohlantirish e’lon qilindi.
Xususan, quyidagi hududlarda xavf yuqori deb baholanmoqda:
- Qashqadaryo viloyatida – Kitob va Shahrisabz tumanlari;
- Surxondaryo viloyatida – Boysun, Sariosiyo va Uzun tumanlari;
- Samarqand viloyatida – Samarqand hamda Urgut tumanlari;
- Jizzax viloyatida – Baxmal va Zomin tumanlari;
- Toshkent viloyatida – Bo‘stonliq, Parkent va Ohangaron tumanlari (Chotqol tog‘ tizmasi);
- Namangan viloyatida – Pop tumanida qor ko‘chishi ehtimoli mavjud.
Mutaxassislar tog‘li hududlarda yashovchi aholi, dam olish maqsadida borgan fuqarolar hamda ushbu hududlarda harakatlanayotgan haydovchilarni alohida ehtiyotkor bo‘lishga chaqirmoqda.
Ayniqsa, ob-havo keskin o‘zgarayotgan paytda xavfsizlik qoidalariga amal qilish, ortiqcha tavakkalchilikdan qochish va rasmiy ogohlantirishlarga befarq bo‘lmaslik tavsiya etiladi.
