Futbol eksperti Aleksandr Tochilin «Yevro-Futbol.Ru» nashriga bergan eksklyuziv intervyusida FIFA prezidenti Janni Infantinoning Rossiyaga qo'yilgan taqiqni bekor qilish haqidagi fikrlari, shuningdek, MOK yaqin orada Rossiya sportiga nisbatan barcha sanksiyalarni olib tashlashi mumkinligi haqida tarqalgan xabarlarga munosabat bildirdi. Bu haqda euro-football.ru xabar beradi.
Tochilinning aytishicha, jahon OAVlari MOKning Milandagi yig'ilishida Rossiya sportiga qo'yilgan cheklovlarni tez orada bekor qilish bo'yicha prinsipial qaror qabul qilingani haqida yozmoqda. U bunday ssenariy ro'y berishiga umid qilishini, bu mavzu ancha vaqtdan beri muhokamada ekanini ta'kidladi.
Ekspertning fikricha, Rossiyaning izolyatsiyadan chiqishi uchun Yevropada ham aniq siyosiy iroda kerak. Shu bilan birga, u katta musobaqalar Rossiyasiz tomoshaboplik va intriga jihatidan yutqazishini tashkilotchilar ham tushunib turganini qayd etdi.
Infantino bir necha kun avval Rossiya jamoalariga qo'yilgan banni olib tashlash tarafdori ekanini bildirib, chetlatishni mantiqsiz deb atagani ham Tochilin e'tiboridan chetda qolmadi. U bu bayonotni dunyodagi jarayonlar fonida tabiiy holat sifatida baholab, Rossiyaga nisbatan ikki xil standartlar va biryoqlama yondashuv ko'rinayotganini aytdi.
Tochilinning ta'kidlashicha, vaqt o'tishi bilan vaziyat o'zgaradi va taqiqning o'zi ham tobora «absurd» ko'rinishga kelmoqda. Uningcha, buni futbol rahbariyatining o'zi ham tushunmoqda.
MOK sanksiyalarni bekor qilsa, bu FIFA va UEFAdagi qarorlarga ham ta'sir qiladimi, degan savolga Tochilin aniq javob berdi: uning fikricha, bu zanjirli reaksiya bo'ladi. U kim birinchi bo'lib qadam tashlashi muhimligini, MOK kabi yirik tuzilma precedent yaratsa, qolgan tashkilotlar ham o'z pozitsiyasini qayta ko'rib chiqishini ta'kidladi.
Infantinoning kelajakda jamoalarni siyosat sabab musobaqalardan chetlatishni qonuniy tarzda taqiqlash kerakligi haqidagi g'oyasiga ham Tochilin qo'shildi. U sportning asosiy shiori siyosatdan xoli bo'lishi kerakligini, Rossiyaga nisbatan qabul qilingan qarorlar esa bu tamoyilga zid ekanini eslatdi.
OAVlarda FIFA aprel oyidagi kongressda Rossiyaning xalqaro turnirlarga to'liq qaytishi masalasini ko'rib chiqishi mumkinligi haqida ham xabarlar tarqalmoqda. Tochilin bunday muddatlarda qaytish ehtimolini inkor etmadi va bunday ma'lumotlar bekordan-bekorga paydo bo'lmasligini aytdi.
Shuningdek, u Rossiya qayta qo'yib yuborilgan taqdirda ham ayrim jamoalar maydonga tushishdan bosh tortishi mumkinligini tan oldi. Bunday vaziyatda texnik mag'lubiyatlar masalani tartibga soladimi, degan savolga u har bir tashkilotning o'z reglamenti borligini, u buzilganida intizomiy choralar qo'llanishi shartligini bildirdi.
Tochilinning fikricha, kimdir ataylab o'ynashdan bosh tortsa va buning uchun texnik mag'lubiyat yozilsa, bu boshqalar uchun ham signal bo'ladi. U bunday demarshlar oxir-oqibat o'sha jamoalarning o'ziga zarar keltirishini ta'kidladi.
Elena Grigoryevskaya
“Zamin”ni Telegramʻda oʻqing!
