«Lokomotiv»ning sobiq prezidenti Nikolay Naumov «Benfika» bosh murabbiyi Joze Mourinyu faoliyatini davom ettirishi mumkin bo‘lgan eng mos manzil haqida fikr bildirdi. U bu boradagi mulohazalarini «Yevro-Futbol.Ru» nashriga bergan intervyusida aytdi. Bu haqda euro-football.ru xabar beradi.
Naumovning ta’kidlashicha, Mourinyuning eng shov-shuvli va kutilmagan g‘oyalari bilan ajralib turadigan davri ortda qolgan. Ekspert fikricha, portugaliyalik mutaxassis hozir futbol rivojidan biroz ortda qolgan va avvalgi o‘ziga xosligini yo‘qotib, oddiyroq murabbiy ko‘rinishiga kirgan.
Shu sabab Naumov Mourinyu uchun Saudiya Arabistoni chempionati ayni muddao bo‘lishini aytdi: u yerda maoshlar yuqori, janjal va shov-shuvlar qadrlanadi, shuningdek, yoshi katta yulduz futbolchilar bilan ishlash imkoniyati ham bor. Naumovning fikricha, aynan shu liga Mourinyuga mos keladi.
Mourinyu boshqaruvidagi «Benfika» Chempionlar ligasi 1/16 finalida Madridning «Real» klubiga qarshi maydonga tushadi. Dastlabki uchrashuv 17 fevral kuni Portugaliyada bo‘lib o‘tadi.
“Zamin”ni Telegramʻda oʻqing!
