Boks muxlislari uchun haqiqiy sensatsiya kutilayapti — 55,3 kg vazn toifasida mutlaq jahon chempioni Naoya Inoue 2 may kuni Junto Nakataniga qarshi ringga koʻtariladi. Ushbu qarama-qarshilik nafaqat Yaponiya, balki butun boks olami diqqat markazida turibdi.
“The Day” tashkilotchilari tomonidan eʼlon qilingan ushbu jang allaqachon “Yaponiya boks tarixidagi eng yirik voqealardan biri” sifatida baholanmoqda. Bu gaplar bekor emas — 55 ming tomoshabinga moʻljallangan arenaning barcha chiptalari oldindan toʻliq sotib boʻlingan.
Qizigʻi, har ikki bokschi ham haligacha magʻlubiyat nimaligini bilmaydi. Naoya Inoue 32 ta jangda 32 marta gʻalaba qozongan boʻlib, shularning 27 tasini nokaut bilan yakunlagan. Junto Nakatani esa 32 ta gʻalabaga ega boʻlib, ularning 24 tasi muddatidan avval qayd etilgan.
Bundan tashqari, ikki sportchining nufuzi ham yuqori darajada. The Ring jurnali reytingida Inoue dunyo boʻyicha ikkinchi, Nakatani esa oltinchi oʻrinni egallab turibdi. Bu esa ular oʻrtasidagi jang haqiqiy top darajadagi toʻqnashuv boʻlishini anglatadi.
Qisqacha aytganda, bu bellashuv oddiy jang emas — bu tarix, obroʻ va mutlaq ustunlik uchun kurash. 2 may kuni Tokioda boks muxlislarini katta shou kutayotgani aniq.
“Zamin”ni Telegramʻda oʻqing!
