Angliya kubogi yarim finali doirasida «Chelsi» va «Lids» jamoalari o'zaro bahs olib boradi. London klubi ayni damda inqirozli holatda bo'lib, ketma-ket beshta mag'lubiyatdan so'ng Yevrokuboklar hududidan chiqib ketdi. Jamoa bosh murabbiyi Liam Rozenior iste'foga chiqarilgach, vaqtinchalik boshqaruv Kalum Makfarlanga topshirildi. «Chelsi» ushbu mavsumda ilk bor Premyer-liga darajasidagi raqibga qarshi maydonga tushadi. Bu haqda Goal.com xabar beradi.
«Lids» jamoasi barcha musobaqalarda yetti o'yindan iborat mag'lubiyatsiz seriyasini davom ettirmoqda. Daniel Farke shogirdlari chempionatda 40 ochkolik dovonni zabt etib, elitada qolish masalasini deyarli hal qildi. Endilikda «tovuslar» bor e'tiborini kubok bahsiga qaratishi mumkin. Jamoa 1973-yildan buyon ilk bor final yo'llanmasini qo'lga kiritish uchun kurashadi.
Tarkib masalasida «Chelsi» jiddiy yo'qotishlarga duch kelgan. Jamoa yetakchilari Koul Palmer va Joao Pedro jarohat sabab maydonga tusha olmaydi, Estevao esa mavsum oxirigacha safdan chiqqan. «Lids» safida esa Daniel Jeyms umumiy guruhga qaytgan bo'lsa-da, Anton Stax hali ham jarohatini davolash bilan band.
Statistikaga ko'ra, «Chelsi» ushbu musobaqaning so'nggi 15 ta yarim finalidan 12 tasida g'alaba qozongan. Biroq londonliklar 2012-yildan beri atigi bir marta kubokni boshi uzra baland ko'targan. Uchrashuv 2026 yil 26 aprel kuni Toshkent vaqti bilan soat 20:00 da start oladi.
