«Inter Miami» jamoasi o'zining yangi «Nu Stadium» arenasida g'alabasiz seriyasini davom ettirmoqda. «Nyu-Inglend Revolyushn» klubiga qarshi kechgan bahsda maydon egalari irodali durangga imzo chekishdi. Lionel Messi va uning jamoadoshlari uchun uy uchrashuvidagi ilk g'alaba hali ham ushalmas orzu bo'lib qolmoqda. Bu haqda Goal.com xabar beradi.
Uchrashuvning 57-daqiqasida mehmonlar vakili Karles Xil «Inter Miami» himoyasidagi xatolardan foydalanib, darvozabon Deyn Sent-Klerni dog'da qoldirdi va hisobni ochdi. Shundan so'ng maydon egalari hujumkorlikni oshirishdi. Luis Suaresning kuchli zarbasidan so'ng qaytgan to'pni German Berterame darvozaga joylab, muvozanatni tikladi. Bu Berterame uchun mavsumdagi uchinchi gol bo'ldi.
O'yin yakunida «Inter Miami» g'alabani ilib ketishi mumkin edi, biroq raqib darvozaboni Matt Terner bir nechta xavfli vaziyatlarda o'z mahoratini ko'rsatdi. Shuningdek, zaxiradan maydonga tushgan Tadeo Alyendening goli hakamlar tomonidan bahsli ofsayd sababli bekor qilindi. Endi jamoa kelasi haftada o'zining ashaddiy raqibi «Orlando Siti»ga qarshi bahs olib boradi.
“Zamin”ni Telegramʻda oʻqing!
