Fransiya terma jamoasi va Madridning “Real” klubi hujumchisi Kilian Mbappe o‘z faoliyatidagi eng og‘ir va iztirobli pallalardan birini yodga oldi. Uning aytishicha, milliy jamoa safidagi bir omadsiz o‘yindan keyin u keskin tanqidlar va hatto haqoratlarga duch kelgan.
Gap 2020 yilgi Yevropa chempionati 1/8 finali haqida bormoqda. O‘sha bahsda Fransiya Shveysariyaga qarshi maydonga tushib, dramatik tarzda mag‘lubiyatga uchragan edi. O‘yin asosiy vaqtda 3:3 hisobida yakunlanib, penaltilar seriyasiga o‘tgan va aynan shu pallada Mbappening zarbasi golga aylanmagan.
Futbolchi shu voqeadan keyin muxlislar tomonidan qattiq bosimga uchraganini tan oldi. Uning so‘zlariga ko‘ra, ayrimlar uni haqorat qilib, hatto irqchilikka yo‘g‘rilgan so‘zlar ishlatgan.
«Meni “maymun” deb atashdi. O‘shanda o‘z-o‘zimga savol berdim: men shunday insonlar uchun o‘ynayapmanmi? Milliy jamoa men uchun eng muhim, lekin bitta xato seni pastga tushirib yuborar ekan», — deya xotirlaydi u.
Mbappe bu holat unga juda og‘ir taʼsir qilganini yashirmadi. U taʼtilga chiqib, dastlabki kunlarda o‘zini ruhan siniq holatda his qilganini aytdi. Hatto bir muddat milliy jamoaga qaytmaslik haqida ham jiddiy o‘ylab ko‘rgan.
U Fransiya futbol federatsiyasining o‘sha paytdagi rahbari Noel Le Gre bilan ham uchrashganini maʼlum qildi. Suhbat chog‘ida u terma jamoada o‘ynashni davom ettirmaslik niyatini bildirgan. Biroq federatsiya rahbari uni fikridan qaytarishga harakat qilgan.
«Men qaytishni istamasdim, Parijga ketib, tinch o‘ynashni xohladim. Lekin menga bu holatni unutishim kerakligini aytishdi», — deydi futbolchi.
Bu voqea yana bir bor futbolchilar faqat maydonda emas, balki ruhiy jihatdan ham qanchalik bosim ostida ekanini ko‘rsatadi. Bir o‘yin, bir zarba — va butun jamoatchilik munosabati o‘zgarib ketishi mumkin.
Shunga qaramay, Mbappe bu qiyinchiliklarni yengib o‘tib, yana yuqori darajada o‘ynashda davom etmoqda. Bu esa uning nafaqat kuchli futbolchi, balki mustahkam xarakter egasi ekanini ham isbotlaydi.
“Zamin”ni Telegramʻda oʻqing!
