Sunʼiy intellekt sohasidagi yetakchi kompaniyalardan biri boʻlgan Anthropic dushanba kuni Stainless startapini xarid qilganini eʼlon qildi. Ushbu kompaniya Stripe sobiq muhandisi Aleks Rattrey tomonidan asos solingan boʻlib, uning dasturiy taʼminotidan OpenAI, Google va Cloudflare kabi yirik texnologik gigantlar keng foydalanib kelgan. Bu haqda Techcrunch.com xabar beradi.
Bitim shartlari oshkor etilmagan boʻlsa-da, avvalroq tarqalgan xabarlarga koʻra, Anthropic ushbu startap uchun 300 million dollardan ortiq mablagʻ sarflagan boʻlishi mumkin. Stainless kompaniyasi Sequoia Capital va Andreessen Horowitz kabi nufuzli venchur fondlari tomonidan moliyalashtirilgan.
Stainless asosan dasturchilarga API bilan ishlashda yordam beruvchi SDK (dasturiy taʼminotni ishlab chiqish toʻplamlari) yaratish va ularni avtomatlashtirilgan tarzda yangilab borish xizmatlari bilan mashhur. Ushbu texnologiya AI agentlari uchun tashqi dasturlar bilan bogʻlanishda juda muhim hisoblanadi.
Anthropic kompaniyasining maʼlum qilishicha, Stainless xizmatlari endilikda faqat ularning oʻziga xizmat qiladi va boshqa kompaniyalar uchun yopiladi. Hozirgi kunga qadar yaratilgan SDKʼlar esa mijozlar ixtiyorida qoladi va ulardan foydalanishda hech qanday cheklovlar boʻlmaydi.
Aleks Rattrey oʻz bayonotida Anthropic bilan hamkorlik qilish va Claude platformasini rivojlantirishga hissa qoʻshishdan mamnun ekanini taʼkidladi. Bu xarid Anthropicʼga oʻz infratuzilmasini mustahkamlash va raqobatchilardan ustunlikka erishish imkonini beradi.
“Zamin”ni Telegramʻda oʻqing!
