Bose kompaniyasining uyqu texnologiyalari boʻlimi sobiq rahbari tomonidan asos solingan SOND startapi oʻz faoliyatini ochiq eʼlon qildi. Boston shahrida joylashgan ushbu kompaniya uyqu sifatini yaxshilashga moʻljallangan yangi avlod quloqchinlarini ishlab chiqish uchun 7 million dollar miqdorida sarmoya jalb etishga muvaffaq boʻldi. Bu haqda Techcrunch.com xabar beradi.
Kompaniyaning debyut mahsuloti Dreambuds deb nomlanib, u shunchaki shovqinni toʻsuvchi vosita emas, balki foydalanuvchining holatiga qarab real vaqt rejimida chora koʻruvchi tizimdir. Qurilma nafas olish, yurak urishi oʻzgaruvchanligi va tana holati kabi 12 xil fiziologik signalni kuzatib boradi. Ushbu maʼlumotlar bulutli texnologiyalarga asoslangan AI sleep coach tizimiga uzatiladi va sunʼiy intellekt foydalanuvchi uchun eng mos keladigan audio dasturni tanlaydi yoki yaratadi.
SOND asoschisi va bosh direktori Yadid Ayzenberg ilgari Bose kompaniyasida Sleepbuds 2 loyihasini boshqargan. Bose uyqu texnologiyalari bozoridan chiqishga qaror qilganidan soʻng, Ayzenberg ushbu yoʻnalishda yangi startapga asos solishga qaror qildi. Unga Google kompaniyasining sobiq muhandisi Amir Lazarovich texnik direktor sifatida hamrohlik qilmoqda.
Investitsiya raundi E14 Fund, Crosslink Capital, Ubiquity Ventures va boshqa bir qator yirik jamgʻarmalar tomonidan qoʻllab-quvvatlandi. Dreambuds foydalanuvchilari nafaqat tayyor audio dasturlardan foydalanishlari, balki sunʼiy intellekt bilan muloqot qilib, oʻzlariga xos uyqu tahlillarini olishlari ham mumkin boʻladi.
“Zamin”ni Telegramʻda oʻqing!
