YouTube'даги SNG Garage World канали Chevrolet Cobalt Midnight моделининг илк тест-драйвини ўтказди. Муаллиф ҳазил билан янги моделнинг барча камчиликларини очиб берди: ташқи кўринишдан тортиб, юкхона тугмасининг йўқлигига қадар.
- "Биз сиз учун самимий шарҳни тайёрладик – объектив ва ҳурмат билан. Янги Cobalt ташқи кўринишида деярли ўзгариш қилмаган", дейди муаллиф.
Ташқи кўринишни муаллиф шундай таърифлайди: "Cobalt'ни фақат ўз онаси яхши кўриши мумкин". Янгиланиш фақат қора оптика, қора дисклар ва Midnight ёзуви билан чекланган.
Кўпчилик кутган "бразилиялик версия" ҳали ҳам йўқ. Шу эски бурчакли кузов ва амалий дизайн ўрнида қолган. Чиройли эмас, лекин таниб олиш осон. Ички қисмда янгиланишлар сезиларли, бироқ улар ҳам ўзига хос камчиликлардан холи эмас.
Энг катта ноқулайлик - салон ичида юкхона учун тугма йўқлиги. "Битта тугма қўшишса бўларди-ку!" дея таъкидлади муаллиф.
Шунингдек, орқа ўриндиқда тирсак қўйиш учун жой кўрсатилган, лекин аслида бундай имконият йўқ. Ижобий томондан: экокожа қопламаси, ўриндиқлар иситкичининг ишлаши, Apple CarPlay ва Android Auto қўллаб-қувватлаган янги мультимедиа тизими, одатий ҳисоблагич ва заводдан ўрнатилган круиз-контрол бор.
Автомат узатма қутиси "ақллироқ" бўлиши айтилган, аммо амалда сезиларли фарқ йўқ. Узатишлар ҳали ҳам силтаниб ўтади, бу баъзи ҳайдовчиларни норозиликка олиб келган.
ABS тизими яхшилангани айтилган бўлса-да, тормозлаш хавфсизлиги камайган. Тормозлар юмшоқроқ, аммо ишонч ҳисси йўқолгандек.
Двигателга келсак, 1.5 литрли атмосфералик мотор Euro-5 талабларига мослаштирилган. Ёқилғи сарфи ва чиқиндилар камайган, лекин моторнинг "жўшқинлиги" ҳам бироз пасайган.
Олдинги моделга қараганда бу мотор сокинроқ ва барқарорроқ ишлайди. Асосий афзаллик - бу двигателнинг ишончлилиги.
Ҳар қандай ёқилғида, ҳатто метанда ҳам муаммосиз ишлайди. Хулоса қилиб айтганда, Chevrolet Cobalt Midnight камчиликларга қарамай, яхшироқ бўлган.
Янги салон, мультимедиа тизими, круиз-контрол ва ишончли двигател - буларнинг барчаси ҳурматга лойиқ. Бу техник жиҳатдан замонавийроқ, аммо оддий ва ишончли халқ автомобили бўлиб қолмоқда.
