Ўзбекистонда сунъий интеллект билан боғлиқ стартаплар учун $100 миллион ажратилади. Ушбу маблағлар давлат органлари фаолиятига сунъий интеллектни жорий этиш, шунингдек, иқтисодиёт ва ижтимоий соҳадаги лойиҳаларни қўллаб-қувватлашга йўналтирилади.
Ажратилган маблағнинг $50 миллиони давлат тузилмаларига сунъий интеллект технологияларини жорий этиш орқали уларнинг самарадорлигини ошириш ва аҳоли учун хизмат сифатини яхшилашга сарфланади. Қолган $50 миллион эса «Фондлар фонди» ва IT Park Ventures венчур фондлари орқали истиқболли стартаплар ва сунъий интеллектдан фойдаланувчи лойиҳаларни амалга оширишга йўналтирилади.
Маблағларни тақсимлаш вазифаси «Рақамли Ўзбекистон – 2030» стратегиясини амалга ошириш бўйича Мувофиқлаштирувчи комиссия томонидан бошқарилади.
