Goldman Sachs ва Morgan Stanley вакиллари 2026–2027 йилларда фонд бозорларида 10–20% оралиғида пасайиш бўлишини тахмин қилишмоқда. Бу ҳақда АҚШнинг CNBC телеканали хабар берди.
Goldman Sachs бош директори Дэвид Соломон Гонконгдаги инвестиция саммитида сўзга чиқиб, узоқ муддатли "айиқ бозорларида" бундай тузатишлар одатий ҳол эканлигини таъкидлади. "Аввал инвестициялар ўсади, кейин эса пасаяди, бу жараёнларни қайта таҳлил қилиш имконини беради", — деди у.
Morgan Stanley раҳбари Тед Пик ҳам ушбу фикрни тасдиқлаб, инвесторларга бундай пасайишларни ижобий қабул қилишни тавсия қилди. Унинг сўзларига кўра, фонд бозоридаги пасайишлар инқироз белгиси эмас, балки соғлом тенденциялардир.
Ҳозирда глобал акциялар бозори сунъий интеллектга бўлган катта қизиқиш туфайли ўсишда давом этмоқда. CNBC маълумотларига кўра, ўтган ойда Япония Nikkei 225 ва Жанубий Корея Kospi индекслари рекорд даражага етди, Хитойнинг Shanghai Composite индексӣ эса ўтган ўн йилликдаги энг юқори кўрсаткични қайд этди.
Goldman Sachs ва Morgan Stanley вакилларининг фикрига кўра, яқин йилларда Осиё етакчи ўсиш минтақаларидан бири бўлади. Хусусан, Goldman Sachs экспертлари Хитойга қизиқиш юқори даражада давом этишини қайд этишди, чунки мамлакат ҳали ҳам дунёнинг энг йирик иқтисодиётларидан бири саналади.
