Саудия Арабистонида спорт олами яна бир қизғин баҳс марказида қолди. Машҳур спорт журналисти ва телебошловчи Валид Ал Фараж «Ал Наср» ҳужумчиси Криштиану Роналдунинг сўнгги пайтлардаги хатти-ҳаракатларига нисбатан очиқ ва кескин позиция билдирди. Унинг таъкидича, португалиялик юлдуз ўзининг катта номи ва таъсирини ҳаддан ташқари ишлатиб юбормаслиги керак.
Ал Фараж бу масалада гапни айлантирмади: Роналдунинг Саудиядаги ўрни бор, аммо бу ўрин қоида ва ҳурмат билан бирга келади. Журналистнинг фикрича, бу мамлакат — Саудия Арабистони, ҳеч қачон “кимнингдир шахсий майдони” эмас. Шу нуқтада у жуда қаттиқ ибора ишлатиб, Роналду ўз чегарасини билиши шартлигини айтди.
У яна бир муҳим жиҳатга урғу берди: Роналду Саудияда олаётган маош — Европада ҳатто тасаввур қилиш қийин бўлган рақам. Демак, бу ерда ҳам масъулият, ҳам профессионал муносабат талаб қилинади. Ал Фаражнинг позициясига кўра, юлдуз футболчи лигани, клубни ва шу чемпионатни кўтариб турган тизимни ҳурмат қилиши керак — ёки ўз йўлини бошқа жойдан излаши лозим.
Эслатиб ўтиш керак, хабарларда Роналду сўнгги вақтларда Саудия Арабистони суверен жамғармаси — PIF юритаётган айрим сиёсатлардан норози экани, ҳатто «Ал Наср»нинг айрим машғулотлари ва ўйинларини ўтказиб юборгани ҳақида гап-сўзлар тарқалган. Шунинг учун ҳам бу чиқишлар мухлислар орасида “жиддий сигнал” сифатида қабул қилинмоқда.
Чунки Роналду кетса, бу фақат «Ал Наср» учун эмас, бутун лига учун ҳам оғир зарба бўлиши мумкин: нуфуз, реклама, маркетинг, халқаро эътибор — ҳаммаси бир зумда босим остида қолади. Саудия чемпионати охирги йилларда айнан катта номлар орқали глобал саҳнага чиқишни тезлатган, Роналду эса шу лойиҳанинг энг кучли “магнити” бўлиб келган.
Бироқ ҳозирги вазият шуни кўрсатяптики: катта ном — катта талаб дегани. Мухлисларга эса битта нарса қизиқ: юлдузлар лигани безаб, унинг қадрини оширадими ёки тортишувлар билан унинг имиджига соя соладими? Энди энг ҳал қилувчи жавобни Роналдунинг ўзи беради — майдондаги ҳаракати билан.
“Zamin”ни Telegram'да ўқинг!
