АҚШ президенти Дональд Трампнинг Ўзбекистон томонидан Америка иқтисодиётига $135 миллиард миқдорида инвестиция киритилиши ҳақидаги баёноти молия бозорларига ижобий таъсир кўрсатиши мумкин, деб хабар беради молиявий технологиялар таҳлил компанияси TipRanks.
«Айниқса, бу авиация ва инфратузилма соҳаларида фаолият юритувчи компанияларга ижобий таъсир кўрсатади. Boeing ва Caterpillar компаниялари маҳсулотларига талаб ошиши мумкин», — дейилади компания таҳлилида.
Шунингдек, инвесторларнинг Tesla ва Industrial, Technology, Energy Select Sector SPDR каби соҳа фондларига ҳам қизиқиши ортиши кутилмоқда.
Трампнинг сўзларига кўра, Тошкент 2028 йилгача $35 миллиардлик маҳсулот харид қилиш ва инвестиция киритишни режалаштирган. Келгуси ўн йил давомида эса бу кўрсаткич $100 миллиарддан ошиб кетиши мумкин.
Bloomberg хабарига кўра, ўтган йили Ўзбекистоннинг ялпи ички маҳсулоти $115 миллиардни ташкил қилган.
