Россия Премьер-лигасининг 15-турида Москванинг "Спартак" жамоаси "Ахмат" устидан 2:1 ҳисобида иродали ғалабага эришди. Москваликлар сафида Факундо Солари дублга эришди, мезбонларнинг ягона голини эса Георгий Мелкадзе киритди.
Учрашув бошидан "Спартак" устунликни қўлга олди. 17-дақиқада Маркиньос рақибнинг хатосидан фойдаланган ҳолда кучли зарба йўллади, аммо тўп устунга тегди.
37-дақиқага келиб Солари Гарсиянинг узатмасидан кейин дарвозани аниқ нишонга олиб ҳисобни очди — 0:1. Танаффусга қадар "Ахмат" фаоллашди.
Садулаев икки бор хавфли узатма амалга оширди, Исмоил Силва эса 27 метрдан кучли зарба йўллади, бироқ тўп устунга тегди. Биринчи бўлим Москва жамоасининг минимал устунлиги билан якунланди.
Иккинчи бўлимда мезбонлар ҳисобни тенглаштиришга уриниб, ҳужумга ўтишди, бироқ 53-дақиқада Солари Дмитриевнинг узатмасини бош билан дарвозага йўллаб дублга эришди — 0:2. Шунга қарамай, "Ахмат" таслим бўлмади.
60-дақиқада бурчак зарбаси вақтида Георгий Мелкадзе бош билан гол киритиб ҳисобни қисқартирди — 1:2. Қолган дақиқаларда мезбонлар ҳужумларини кучайтирди, аммо Москва жамоаси ҳимояда қатъий турди.
"Спартак" бош мураббийи Станкович қизғин ҳис-туйғулари учун сариқ карточка олди. Ҳакам учрашувга беш дақиқа қўшимча вақт белгилади, аммо "Спартак" ҳисобни сақлаб қолишга муваффақ бўлди ва учрашув якунида муҳим уч очкони қўлга киритди.
