«Арсенал»нинг собиқ футболчиси Александр Глеб «канонирлар»нинг жорий Чемпионлар лигасидаги имкониятлари ҳақида фикр билдирди. Бу ҳақда euro-football.ru хабар беради.
Беларуслик экс-ҳужумчи лондоликлар мусобақанинг умумий босқичини жуда кучли ўтказганини тан олди. Бироқ Глебнинг айтишича, ҳозирча турнирда ягона яққол фаворитни ажратиш қийин.
«Ҳаммаси 1/8 финал иштирокчилари тўлиқ маълум бўлгач, аниқроқ кўринади. Лекин, албатта, собиқ клубим Чемпионлар лигасини ютса ёки ҳеч бўлмаса финалгача етса, бундан хурсанд бўламан», — деди Глеб.
Шунингдек, у Чемпионлар лигаси финалида икки ҳужумкор, футбол ўйнайдиган жамоани кўришни исташини ҳам қўшимча қилди.
Маълумот ўрнида, «Арсенал» Чемпионлар лигасининг умумий босқичини биринчи ўринда якунлаб, саккизта учрашувнинг барчасида ғалаба қозонди. «Канонирлар» турнирнинг янги форматида бундай натижага эришган илк жамоа бўлди.
“Zamin”ни Telegram'да ўқинг!
