«Ал-Наср» бош мураббийи Жорже Жезуш Криштиану Роналдунинг яқинлашиб келаётган учрашувни ўтказиб юбориши сабабини изоҳлади. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида «Аркадаг»га қарши майдонга тушади. Португалиялик юлдуз ҳужумчи бойкотдан сўнг тез орада сафга қайтиши кутилаётган бўлса-да, бу баҳсда ҳам унинг номи қайдномадан жой олмайди.
Жезушнинг таъкидлашича, жамоа зич тақвим сабаб Роналдуни ва асосий таркибдаги яна бир нечта футболчини асрашга қарор қилган. Мураббий учун кейинги турда «Ал-Фатеҳ»га қарши ўйин алоҳида аҳамиятга эга.
Шунингдек, Жезуш Роналдунинг Саудия Арабистонидан ташқарида ўтадиган учрашувларни тез-тез ўтказиб юбориши янгилик эмаслигини ҳам эслатди, дея хабар берди Al Nassr Zone.
Саудия чемпионатидаги «Ал-Фатеҳ» – «Ал-Наср» ўйини шанба, 14 февраль куни бўлиб ўтади.
“Zamin”ни Telegram'да ўқинг!
