"Реал Мадрид" юлдузлари Родригони қўллаб-қувватлаш учун майдонга махсус либосларда чиқишди
"Реал Мадрид" футболчилари оғир жароҳат олган жамоадоши Родриго Гоесга бирдамлик билдириш мақсадида махсус футболкаларда майдонга чиқишди. Родригонинг жароҳати жорий мавсумда унинг клуб ва терма жамоа миқёсида иштирокини тугатди. Тиббий текширувлар натижасида унинг тикланиши 7-9 ой давом этиши кутилмоқда, бу эса уни жаҳон чемпионатидан ҳам четлатиши мумкин. Мураббий Алваро Арбелоа учун бу вазият тактик муаммо туғдирмоқда.
"Реал Мадрид" футболчилари Испания чемпионати доирасидаги "Селта"га қарши ўйин олдидан оғир жароҳат олган жамоадоши Родриго Гоесга бирдамлик билдиришди. Футболчилар майдонга бразилиялик ҳужумчини қўллаб-қувватловчи махсус футболкаларда чиқиб келишди. Бу ҳақда Goal.com хабар беради.
Клуб тиббий департаменти 25 ёшли ҳужумчининг ўнг оёғида тизза олдинги хочсимон боғламлари ва ташқи мениск йиртилганини тасдиқлади. Ушбу ташхис футболчи учун жорий мавсум ҳам клуб, ҳам терма жамоа миқёсида якунланганини англатади.
Родриго 2 март куни "Хетафе"га қарши баҳсда захирадан майдонга тушганидан 11 дақиқа ўтиб жароҳат олган эди. Тикланиш жараёни етти ойдан тўққиз ойгача давом этиши кутилмоқда, бу эса унинг жаҳон чемпионатини ҳам ўтказиб юборишига сабаб бўлади.
«Ҳаётимнинг энг ёмон кунларидан бири, бу жароҳатдан доим қўрққанман. Мавсумнинг қолган қисмида ва жаҳон чемпионатида иштирок эта олмаслигим жуда оғир, аммо мен кучли бўлишим керак», — деб ёзди футболчи ижтимоий тармоқларда.
Ҳужумчининг сафдан чиқиши мураббий Алваро Арбелоа учун жиддий тактик муаммо туғдирмоқда. Килиан Мбаппе ҳам ҳозирча ёрдам бера олмаётган бир пайтда, "Реал Мадрид" ҳужум чизиғи мавсумнинг ҳал қилувчи палласида жиддий синовга дуч келмоқда.
Изоҳлар 0
…